Dili sila motambong

Nahimong kabahin sa programa ang parent recollection sa mga tulonghaan labina gyud ang mga tulonghaan nga gidumala og mga relihiyosong kongregasyon sama sa mga madre o dili ba kaha pari. Dunay mga ginikanan nga motambong apan dunay uban usab nga magdumili sa pagbuhat sa ingon. Nagkadaiya ang hinungdan. Dunay gumikan sa panginabuhi apan dunay uban nga dili lang gyud kay lagi dili nila feel. Ang recollection alang kanila usa ka laay nga kalihukan. Kun dili ingnon nga obligatory magpagahi-gahi.

Sa mga batan-on nga akong gikahibalag ug nahinabi, kini kasagaran ang ilang angal ngadto sa ilang ginikanan. Tinuod, gihatagan sila sa ilang mga ginikanan sa mga materyal nga panginahanglan. Naghinobra pa man gani ang uban. Hinuon, adunay mga ginikanan nga mas dunay gahin sa ilang bisyo kaysa ilang mga anak. Ang nakapasakit pa gyud mao nga dunay panginahanglan ang bata o batan-on nga wala hisabti, ug kini ang ilang panginahanglan sa panahon. Mao nga ang uban kanila ang mangita na lang og bisan unsang paagi aron lamang makuha nila ang panahon ug atensiyon sa ilang mga ginikanan.

Kun laay man gani itambong sa Parent-Recollection, mas laay kun inig-abot sa imong katiguwangon ingon nga amahan o inahan ang dili na tambongan o duawon sa imong anak. Daghan tuod sila og kuwarta ug malampuson diha sa ilang kinabuhi apan kontento ka na lang ba nga atimanon sa usa ka caregiver nga dili nimo sinati? Sa mga kalihukan nga sama sa Parent Recollection, minimal lang kini nga aghat nga unta magmanggihatagon ka sa imong panahon ug madagayaon ka diha sa imong presensiya. Kay bisan pa man kun dili nimo mahatag ang tanan ingon nga amahan o inahan apan dili ka usa ka langyaw sa kaugalingon mong panimalay.