Husto si Artes

Maayo ra nga gipalayas gikan sa ikaduhang andana sa Taboan public market ang dul-an sa usa ka gatus ka tawo nga gipapuyo diha human sila gi-rescue gikan sa aseras kaniadto.

Sayonan ka nga magsugal na man hinoon ug duna pay uban nga gihimo na nga suyopanan sa shabu ang ilang mga kwarto-kwarto. Dili maayo ug mao nga maayo ra nga gipalayas sila.

Misamot nga misuporta ko sa lakang ni Noel Artes, ang hepe sa Squatters Prevention Encroachment Elimination Division (SPEED), kay may report nga miabot nako nga apil sa gipapuyo diha mao ang mga “kabit” sa pipila ka sakop sa SPEED.

Unya kini ra bang mga kabit sa pipila ka sakop sa SPEED nga gipapuyo diha mao pa ang maghawod-hawod. Mora ba og kuto nga nakatung-tong sa buko-buko sa kabaw, nagtoo nga sila kabaw na ‘sab.

Sala ba gud diay sa kagamhanan kun wala sila’y pinuy-anan kining mga tawo nga anaa mangatulog sa aseras? Didto sa ilang dapit sa probinsya duna silay mga balay apan nanganhi g’yud sila sa dakbayan nga walay klaro nga pangita.

Mao kana nga ang uban kanila abi kay anaa magpuyo sa aseras nagtoo na nga sila mga isog, ug maoy “manghingi” og kwarta gikan sa mga driver sa PUJ, ang uban magbantay-bantay sa mga sakyanan.

Kining mga tawhana maayong pabalikon sa dapit kun diin sila gikan. Dunay programa ang dakbayan niini.

* * *

Balik na sab ko. Kamong mga drayber nga dili motuman sa lagda sa tukmang pagmaneho og sakyanan dili magmahay kun madakpan. Apil sa mga sayop sa drayber mao ang pag-drive nga dili mopasiga sa suga panahon sa gabii, unya dili magsul-ob og uniporme (blue nga polo o T-shirt sa PUJ ug puti/pula sa taxi), unya daghan gihapong drivers ang mag-sinelas nga mag-drive.

Kun dili gayud kamo mopatoo sa akong kanunay’ng tambag, ayaw na lang paghangyo kun madakpan kay kun ako ang makasakop ninyo dili g’yud ko magpahangyo kay aron matudloan kamo’g leksyon.

* * *

Nalipay ko nga nakakita nga duna nay balay nga gipangguba diha kilid sa Don Gil Garcia (kilid sa Kapitolyo) aron nga mapalapdan na ang maong karsada ug masulbad na ang problema sa trapiko.

Apan mora’g usa pa kini kabuok balay ang giguba kay ang uban nagpa-ugat g’yud. Hain na man ang pasalig ni Mayor Michael Rama nga ipagamit niya ang mga sakop sa SPEED aron nga ang DPWH makapaspas na sa pagpalapad sa karsada?

Grabe kaayo nga traffic diha sa tumoy nga bahin sa M. Velez ingon man sa Don Gil Garcia kay usa na man lang ka “lane” ang gipaagian kay gisemento pa man ang pikas.

Kun giguba pa unta ang kabalayan nga apektado sa road widening, bahala na unta og lapok ang karsada basta dunay “alternative” nga kaagian. Unya, nganong wala pa man gihapon putla ang dakung kahoy duol sa taytayan? Lain pa nga pangutana, ngano nga ang contractor sa pag-repair sa karsada nga modugtong sa Guadalupe paingon sa Kalunasan wala pa man gihapon sugdi nga may kontrata na man unta?

Kining maong karsada makatabang unta g’yud sa pagpaminus sa problema sa trapiko diha sa M. Velez ingon man sa Don Gil Garcia kay kadtong mopaingon ug gikan sa Lahug nga moadto’s Guadalupe, mahimong anha na lang unta moagi diha.

Bi, susiha kuno ni Mr. Eli Espina kay ikaw man ang gitahasan ni Mayor Rama pagsusi kun nganong wala pa motrabaho ang kontraktor.

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.