EDITORYAL - Ang isyu sa sikyu versus polis

Ang kaso sa usa ka polis versus sikyu nga giingong gikulating sa polis ang sikyu, kasagaran mahitabo tungod kay matag usa kanila hari sa ilang matag teritoryo.

Ang sikyu kun mosulod sa teritoryo sa kapolisan siyempre kinahanglang moyukbo siya sa mga balaod sa maong teritoryo, pero kun polis ang mosulod sa teritoryo sa sikyu, ang naandan ang sikyu maoy moyukbo sa polis imbis ang polis gyud unta maoy moyukbo sa mga panukdanan ug mga balaod nga gipatuman sa maong teritoryo.

Ambot kun anaa ba kaha kini sa subject sa magpolis nga di sa tanang higayon magpatahod ka sa imong isigkaingon , kay lagi hari ka ug balaod ang imong gidala , apan gahini usab og dyutay nga pagrespeto sa katungod sa mga sibilyan aron nga di modasig ang mga rebelde.

Kay usahay gud ang sobra ra nga pagpatahod kumo kay polis ta, mura man og usa ka paagi sa panurambaw, nga imbis danihon nimo ang tawo aron labing motahud ug morespeto kanimo, imo man hinuong giabog aron magdumot ang tawo kanimo.

Apan sa pagpatuman sa balaod alang sa kalinaw ug kahusay, ang kapolisan maoy hari ug obligado ang publiko sa pagtahud kanila tungod kay balaod ug katarungan ang ilang gidala.

Di sila angay bugalbugalan tungod kay ang trabaho sa polis sa pagpatuman balaod bahin sa kalinaw ug kahusay dili sayon nga butang ilabi na karong panahona nga daghan na kaayong badlungon gumikan sa pag-uso sa bisyo sa paggamit sa gidiling drugas.

Gani bisan karong panahona nga hapit matag eskina anaay mga polis nga makita sa publiko, anaa lang gihapoy mga krimen nga mahitabo ning siyudad.

 Ang police visibility maoy kalipay sa mga tarong ug buotang mga tawo kay masiguro nila nga malinawon ang palibot nga ilang nahimutangan kun may presensya sa mga polis. Hinuon kadtong giingon nga gipikpik lang sa opisyal sa polis ang abaga sa sikyu unya mitibi dayon ang naulahi , aw basin tinuod to ug gipasobrahan nalang usab sa sikyu aron labing maduot ang polis.

Hinuon kun ang kamot sa maong polis sama sa kamot ni Pacquiao nga murag 20 kilos ang gibug-aton, aw natural motibi gyud ang mapikpikan niini kay tiaw mo bay 20 kilos ipuspos sa imong abaga .

Apan kun tinuod gyud nga gisumbag sa maong polis ang sikyu, aw lain na nang estoryaha, naa pa diay nang Kinatsila gihapon nga kinaiya karon nga kabarato ra ba sa kinabuhi karong panahona? Di ba?