Band-aid sa karsada

Ang karsada giisip nga usa sa mga tinubdan sa korupsiyon sa nasud. Dinhi sa karsada mahimong ipagawas ang pundo sa gobyerno, dili aron gamiton alang sa serbisyo sa mga tawo kun dili alang sa bulsa sa pipila ka mga politiko ug mga kaabin nila sa hingtungdang mga ahensiya.

Mao kini hinungdan nganong daghan pa kaayo sa atong mga karsada, dili lamang sa Sugbo kun dili sa ubang dapit sa nasud, nga ang gitabon dili semento, kun dili mga aspalto pa.

Hinuon, daghan na sa mga lugar dinhi sa Sugbo nga semento na ang gitabon sa karsada. Apan puwerte pa gihapong daghana nga aspalto pa gihapon.

Dinha sa South Road Properties (SRP), adunay lanes sa karsada nga semento na, apan taas-taas pa ang gigamitan og aspalto.

Apan ang gigamitan og aspalto hilabihang kadaghan sa libaong nga maoy hinungdan sa pagpangguba sa mga sakyanan nga mangagi. Makaluluoy kaayo ang mga sakyanan tungod kay kun mahulog ang ligid sa libaong unya 50 ngadto sa 70 kilometro matag oras ang gipaspason sa dagan, ang mga tie-rod end, rock-end, ug uban pang piyesa nga nagpilit sa ligid ang mangaguba.

Dili ko motuo nga wala masayod ang Department of Public Works and Highways sa kadali ra mabangag, mabungkag ug mapulpog ang aspalto, apan nganong ila pa man nga ipamugos kining “band-aid approach” sa pag-ayo sa mga lubak-lubak sa karsada?

Makaagi man tingale ang mga opisyal sa DPWH sa kurbada dinha sa atubangan sa Sugbu building sa Kawit Point nga hilabihan kadaghan sa lubak-lubak, nagsagol ang tinapak-tapak nga aspalto ug mga bangag-bangag nga kun dili makabantay ang mag-motorsiklo, seguro gyud nga mobalitok.

Apan nganong hangtod karon, wala man gyud na nila tagda ang maong portion sa South Coastal Road?

Ini’g lapas sa eskina Laray, adunay portion dinha nga namura og mag-agi og accordion ang sakyanan sa wala nga bahin sa lane paingon sa siyudad, pero mao lang gihapon, tapak-tapak ra gihapon ang nahimo sa DPWH.

Lain nakong nahibudngan mao kanang padulong sa subway gikan sa habagatan. Puwerteng daghana sa mga cordon nga yellow ug dugay na kaayong gisirad-an ang tuo nga bahin sa lane paingon sa amihanan ilawom mismo sa subway, nagsige og ayo sukad pa niadtong Agosto, pero hangtod karon naa gihapon ang cordon.

Ini’g agi nato, mabantayan nato ang gagmay’ng bangag nga gipangtapaktapakan og aspalto.

Modangat ang pipila ka semana, sirad-an na usab ang lane kay nakalkal na pud ang aspalto.

Magtapak na pud ang DPWH.

Apan basin nagtuo kita nga ang pagpang-aspalto lamang ang nahimong kakuwartahan sa mga kurakot nga opisyal sa gobyerno?

Hasta kining mga sementado na nga karsada nahimo usab nga tinubdan sa kuropsiyon.

Tiaw mo na, nindot na kaayo nga pagka-semento nga karsada kalkalan og tuyo aron sementohon og balik!

Adunay residente sa usa sa mga barangay sa Minglanilla nga misulti nako nga adunay barangay sa maong lungsod nga maayo na kaayo ang karsada nga sementado na, apan karon gipangbungkal gamit ang heavy equipment.

Matud sa nagsulti nako nga ang karsada napuno sa nangapusgay nga semento, apan wala sila masayod kun sementohon ba og balik. Nanghinaot lang sila nga ilisan kini og mas nindot nga karsada.

Apan misantop sa akong hunahuna nga kun sementado ang karsada, apan dulhogon, kuyaw kini sa mga motorista. Tingale, dinhi niining lugara mahimong magamit ang aspalto kay mas mopilit man ang ligid sa aspalto kay sa semento nga dangogon, ilabi na kun mag-ulan.

Apan ang akong punto mao nga bisan semento ang angayan sa usa ka lugar, nganong ipamugos man ang aspalto?

Sa ako nang gika-ingon sa unahan, kining karsada nahimong tinubdan sa kuropsiyon sa nasud.

Hinaot unta nga sa mosunod nga nahibiling katuigan sa administrasyong Aquino, malili-an kining “band aid solution” sa mga bangag-bangag sa karsada. Didto kami sa Taiwan niadto 2007 aron tun-an ang operasyon sa coal-fired power plants nga maoy kasagaran sa mga planta sa kuryente nga nagsuplay sa mga industriya, establisamento ug kabalayan sa maong nasud.

Nakita nako ang pagpangtapak sa karsada sa Taiwan nga dili band-aid, kun dili ang tibuok nga karsada nga adunay mga guba maoy ilisan og hanig, dili ang gagmay’ng bangag lamang nga maoy estilo dinhi sa Pilipinas.