Mogula matag Martes ug Biyernes

Ang Committee on Ways and Means miaprobar sa House Bill No. 834 nga naghatag og 50 porsiyento nga diskwento ug VAT exemption on goods and services ngadto sa mga senior citizens nga mag-edad og 100.

Nindot ug makalipay nga balita. Apan, lisud matuman. Tiaw moy mag-edad una kag 100 aron ka makapahimos ning maong balaud. Unta, ila kining gipaubsan aron daghan ang maka-avail niini, say 90 years old, arang-arang na lang kay ubay-ubay pa ang nagpanuigon niini.

Hinoon, ila sad tingali ning gituyo aron gamay ra ang gahin. Sama sa monthly pension, ang orihinal nga proposal mao nga magsukad sa 70 ang edad, apan sa diha nga ilang nakita nga daku kaayo ang magasto, ila kining gipasakaan ngadto sa 77. At first, 80 unta to, apan gamay ra man nga mga indigents ang makaabot og 80, ila sang gius-osan ngadto sa 77.

Anyway, maayo na lang. At least, nagpakabana na ang atong gobyerno sa kahimtang sa mga senior citizens sa nasud. Gani kun mapatuman lang sa hingpit ang Balaud 9994, bastante na kaayo ni. Apan, sa pagkakaron, sama sa Balaud 9257, maayo’g muabot og 90% ang natuman niini.

Mao ni ang depekto sa atong gobyerno, daghan kaayo kita’g mga maayong balaud, apan kulang o walay implementation. Hinoon, kining balaud alang sa mga centenarians, sayon kining tumanon, tungod kay pila ra may muabot og 100 years old. 

Gani ang mga Japanese nga giila nga “the most longest-living people on the planet,” ang ilang average nga edad, 80 sa mga lalake, ug 86 sa mga babaye. Sa ato pa, di sad daghan ang ilang mga centenarians didto.

Atong makita nga mas taas og kinabuhi ang mga babaye kay sa mga lalake. Tungod ba kaha ni kay mas abusado sa lawas kitang mga lalake kay sa mga babaye? Inom, sigarilyo ug uban pa. Hinoon, gumikan niining giingon nga women’s liberation, daghan na kaayong mga babaye ang nanigarilyo ug nagpalahubog, kaylagi gusto silang mo-equal sa mga lalake.

Alang sa atong mga modern women, nganong i-limit ra man sa mga lalake ang pag-inom ug pag-sigarilyo? Mao nga karon, suma sa atong makita sa mga salida sa sine, daghan na kaayong mga babaye nga manigarilyo ug maghuboghubog.

Incidentally, ang HB 834, kon Centenarians Act of 2010 (last year pa diay ning gipanday) gipangamahanan ni Rep. Edcel Lagman sa Albay, ang hari sa RH Bill. Perhaps, usa ni sa iyang mga paagi pagkontrolar sa population. 

Ang Sec. 5 ning maong balaudnon nagkanayon: “All centenarians shall be entitled to the grant of 50 percent discount and exemption from the VAT, if applicable, on the sale of goods and services from all establishments…” Nindot kaayo, pero pag-100 years old una.

In the meantime, paminaw ug interact sa Senior Citizens Hour sa DYRC, 648 kHz, matag Sabado, 4:00-6:00 pm. Tels. 4125249, 2388173.