Ang miburot nga populasyon

Karong Lunes puhon mahimugso ang ika-pito ka bilyon nga tawo sa kalibutan. Kun asa siyang dapita nga nasud sa kalibutan matawo kini ang atong atangan.

Samtang daghang kanasuran sa kalibutan ang mipili sa ilang kaugalingong symbolic baby, mihimo og mga rally ug ubang kalihokan alang sa pagmarka sa pinakauwahing balita sa pagburot sa populasyon, ang Secretary General sa United Nation nga si Ban Ki-Moon dili nato makita nga magkugos og bata dili sama sa gihimo kaniadto ni Kofi Annan sa dihang mao pa kini ang UN Secretary General.

Matud pa ni Ban Ki-Moon, ang pito ka bilyon nga populasyon sa kalibutan dili kalingawan ug kahimot-an. Iyang gidudahan nga ang ika-pito ka bilyon nga tawo nga mahimugso asa mang dapita sa kalibutan, mahimugso sa kalibutan sa kontradiksyon.

Sa interview sa Time Magazine giingon niini nga aduna tuoy daghang pagkaon apan bilyon gihapong tawo sa kalibutan ang matulog matag gabii nga nagkutoy ang tiyan. Daghang tawo ang nagpuyo nga harohay apan bilyon usab kanila ang nag-ilaid sa tumang kalisod ug nangginiwang.

Ang pagkahimugso sa bata nga momarka sa ika-pito ka bilyon nga populasyon sa kalibutan is a clarion call to action matud pa sa concerned nga UN Secretary General. The event is not a story about numbers, it is a story about people.

Ang pito ka bilyon nga populasyon, pito ka bilyon. Busa ang atong gihisgutan dinhi mao ang pito ka bilyon nga mga tawo sa kalibutan nga nanginahanglan og saktong pagkaon, saktong enerhiya, maayong oportunidad sa kinabuhi, trabaho ug edukasyon, katungod ug kagawasan, kagawasan sa pagsulti ug kagawasan sa pagpadako sa ilang mga anak nga malinawon ug luwas. 

Ang mga panghitabo ug kaguliyang sa kalibutan nga atong nakita ug naobserbahan mga kongkreto kining kamatuoran sa nagkataas nga economic uncertainties, market volatility ug inequality nga posibling makapahimugso og dakong krisis sa kalibutan kun ang mga dagkong lider niini mapakyas sa pagsulbad.

Ang pito ka bilyon nga populasyon sa kalibutan dili kini magpundo. Sigun sa pagbana-bana sa United Nations, sa duha ka bata nga matawo matag segundo sa laing dekadang moabot ang kalibutan sa tuig 2100 aduna na unya’y sobra sa napulo ka bilyon nga populasyon.

Ang United Nation nanagna nga sa tuig 2025 maunhan na unya ang China sa India nga aduna nay hapit 1.5 ka bilyon nga populasyon. Ang mga eksperto nag-ingon nga ang kalibutan mag- atubang na unya og dakong hagit sa kalisod ug pagpanalipod sa kalikupan.

Sa Lunes puhon angayan ba natong ikalipay ang pagkahimugso sa batang momarka unya sa ika-pito ka bilyong populasyon sa kalibutan? Of course, dapat lang. Pero ang iyang pagkahimugso ato usab untang panaminan.