Kamatayon

Kun maghinangat na gani ang Nobiyembre Dos, nahimong sentro sa mga pasundayag sa telebisyon ang mga sugilanon kalabot sa mga kalag, demonic possessions, haunted houses, engkanto ug uban pa. Sa kinatibuk-an ang kamatayon ang nahimong i-associate gyud dayon sa bisan unsang makalilisang. Gani, ang background ni Korina sa iyang Rated K nga programa niadtong Domingo ang nagpakita sa mga kandila, lungon ug dunay paaso pun-an pa sa mga uwang sa iro.

Nan, ang Nobiyembre Dos mao pud ang panahon segun sa komersiyalismo sa paghatag og kinabuhi sa mga matindog balahibo nga mga panghitabo. Daw sa napukaw ang akong imahinasyon sa mga hitabo sa dihang akong gibasa ang duha ka mga libro ni Fr. Jose Francisco Syquia ang Director sa Office of Exorcism sa Archdiocese of Manila.

Bisan pa og mahadlok kita sa kamatayon apan wala kita’y mahimo kay kabahin man kini sa proseso sa kinabuhi. Kay kabahin man angay lamang nga pangandaman dili ba? Kay kabahin man, angayang dawaton. Mubo ra gyud ang kinabuhi busa atong tinguhaon nga mapuy-an to its ultimate ang kinabuhi nga atong nahuptan karon.

Ning adlaw sa mga minatay, imbis atong i-pokus ang atong kaugalingon sa mga giagni kanato sa Komersiyo, ato kunong tan-awon ang matag pantiyon nga atong maagian karong adlaw sa mga nagkadaiyang sam-ang. Pangutan-on nato ang atong kaugalingon:

“Kanus-a ba ako mohigda dinhi?” Hinuon, ang kamatayon dili katapusan kun dili laing hugna sa panaw sa bag-ong pagkinabuhi sa kaban-hawan... Pahulay nga dayon ihatag kanila o Ginoo ug ang kahayag nga walay pagkapalong modan-ag unta kanila!