Mga buhi sa Carreta

Carreta Cemetery, Cebu City—Kun mosud ka sa ganghaan duol sa eskina M. J. Cuenco Ave. ug Gen. Maxilom Extension, ang unang likoanan paingon sa wala mao ang dan nga nagbahin ning labing dako ug labing karaan nga minteryo sa Sugbo. Nga giduma sa duha ka labing dagkong parokya sa Artsidyosesis sa Sugbo: Ang Sto. Rosario Parish maoy nagduma sa mga lubong sa wala nga bahin; ug ang Cebu Metropolitan Cathedral ang nagduma sa mas dako nga tuo nga bahin.

 Ang duha ka parokya nagkasabot nga presyohan og managsama nga P220 ang matag bombilya (10 volts) nga itaod sa mga lubong ug nga magpulipuli sila pagduma sa mga misa alang sa mga minatay matag usa ug tunga ka oras.

* * *

 Ang dan nga naghiwa ning minteryo ngadto sa duha ka parokya mosangko sa Resurrection Chapel nga maoy pahigayonan sa mga misa sa kaparian sa Sto. Rosario. Pila ka lakang sa di ka pang kaabot sa kapilya, makita nimo ang duha ka hut-ong sa mga lubong nga nabuwag gikan sa ubang lubnganan kay pulos kinoral.

 Sa tuo, sa bahin sa Cathedral, ang mga lubong sa mga Katsila sa Sugbo nga sakop sa Asosiacion Benefica Española de Cebu. Sa wala, sa bahin sa Sto. Rosario, tulo ra ka lakang gikan sa mga Katsila, ang mga lubong sa Amerikanhong mga sundawo nga nangamatay sa ikaduhang gubat sa kalibotan.

* * *

 Mga tagduma sa minteryo sa bahin sa Cathedral nibanabana nga moabot og kapin sa 10,000 ka patay’ng lawas ang nalubong dinhi. Sa bahin sa Sto. Rosario, si Padre Charles Louis Jayme nibanabana nga moabot og 8,000 ang mga lubong nga ilang giduma.

Karaang mga Sugbuanon niingon nga ang orihinal nga minteryo mas dako pa kay sa nahibilin karon. Matod nila naapil sa Carreta ang silingan nga Osmeña Cemetery. Dinhi gipanglubong ang mga Sugbuanon nga Katipunero nga gipamatay nga way husay human bilanggoa sa karaang prisohan nga karon Museo Sugbo na.

* * *

Giisip sa kaparian nga usa sa nakahasol sa Carreta mao ang mga buhi nga nia na magpuyo dinhi. Sukad pa sa pamunoan ni kanhi Arsobispo Ricardo Kardinal Vidal nga giawhag ang kadagkoan sa Dakbayan sa Sugbo sa pagpapahawa sa gibanabanang 30 ka pamilya gikan dinhi. Gipasanginlan sa kaparian ang mga buhi nga nagpuyo dinhi nga naghugaw-hugaw ug nahilambigit sa krimen ug ilegal nga drugas.

Apan di tanang nagpuyo dinhi mga badlungon. Nakaila nako ang lima ka pamilya nga gitugotan sa mga tag-iya sa dagkong mausoleo nga makapuyo bugti sa ilang pagpanlimpiyo sa tibuok palibot sa tibuok tuig, bisan di Kalagkalag. Dinhi sila gipanganak, nangaminyo, nanganak ug nangapo. Di mahubit sa pung ang kahibung sa ilang mga panagway nganong gitawag silang sagbot sa Carreta. 

* * *

Email: [email protected]