Inspirasyon luyo sa kagubot

Aduna nay ikaduhang santos ang Pilipinas. Gi-aprobahan na sa Congregation of the Causes of Saints ang opisyal nga petisyon nga himuon nang santo si Blessed Pedro Calungsod, ang Sugbuanon nga sakristan nga nahimong martir didto sa Guam pinaagi sa paghupot sa iyang pagtuo bugti sa iyang kamatayon. Usa kini ka dakong selebrasyon alang sa mga Pilipino nga aduna nay duha ka santos. Gipanlantaw nga pormal nga ipahibawo sa Santo Papa ang maayong balita Pebrero sunod tuig.

Unsay implikasyon sa bag-ong santo sa atong kaliwat ug sa atong dungog. Adunay maayong tubag si Ricardo Cardinal Vidal sa unsay buot ipasabot ining tanan. Usa lang ang tubag---dakong buhi ang pagka-sagrado sa mga Pilipino luyo sa daghang mga pagsuway nga giatubang. Lahi man siguro ang kalibutan atol sa panahon ni Calungsod itandi sa mga panghitabo karon. Apan ang moralidad sa tawo, susama ra kaniadto ug karon. Buot ipasabot, kung sa panahon ni Calungsod gikinahanglan nimong gakson, hangpon ug isabwag ang maayong balita sa pagtuo, mao lang gihapon na ang tumong nato karon. Kung sa panahon ni Calungsod, dakong sala ang pagpatay og tawo, hangtud karon dakong sayop gihapon ang mopatay og tawo.

Ang labing dakong mensahe niining tanan mao nga bisan pa sa daghang kaso sa pagpanulis, pagpatay, pagpanamastamas, pagyatak sa katungod sa ubang tawo, pangabuso ug ang pagkamalupigon, dako gihapon ang posibilidad nga mopatigbabaw ang kamaayo sa usa ka tawo. Luyo sa daghang hagit sa matag adlaw ug sa mga kaguliyang sa palibot, ang mensahe mao nga dili imposible nga makab-ot ang pagka-sagrado sa matag adlaw sa atong gimbuhaton. Ang dakong hagit mao nga unsaon pagsalikway sa mga tentasyon aron isalikway ang pagtuo ug ipatigbabaw ang hakog nga interes luyo sa pag-antos sa ubang mga tawo o mga biktima sa krimen gumikan sa pagkahakog sa tawo.

Panahon man ni Calungsod niadtong 1600’s hangtud niining kasamtangan nga panahon, di’ imposible nga makab-ot ang pagka-maayo o pagka-sagrado. Sayo ning semanaha, napatik sa blog ni CNN Vatican senior analyst John Allen Jr. ang dakong posibilidad nga ang sunod nga mamahimong santo papa gikan sa Pilipinas. Gidayeg ni Allen ang abilidad ni Archbishop Luis Antonio Tagle tungod sa impluwensya niini sa mga katoliko di’ lang sa Asya apan sa dakong bahin sa kalibutan. Ang maayong ideya ni Tagle sa pag-isplikar sa mga makalibog nga pagtulon-an ngadto sa katawhan, ang nakapadayeg sa mga tawo sa iyang liderato.

Ang kaisog ni Tagle sa pagtuki sa mga sensitibong isyu sama sa kakuwang sa mga pari ug ang vow of celibacy niadtong Synod sa 2005 ug 2008 ang usa sa mga hinungdan nga nakapadayeg sa lider sa simbahan sa lahi nga pagtuki ni Tagle sa mga isyu sa katilingban ug sa simbahan. Sayo ning buwana, gitudlo si Tagle nga labing bag-ong Arsobispo sa Manila hulip sa niretiro nga si Gaudencio Cardinal Rosales. Atol sa consistory, ang tinuig nga panagtigum sa mga Cardinal sa kalibutan, sagad nga panganlan sa santo papa ang bag-ong mga Cardinal. Dako ang pagtuo sa mga analyst nga itudlo na ‘sab si Tagle nga bag-ong cardinal sa nasud. Adunay suod nga koneksyon si Tagle ug ang santo papa tungod kay nagka-uban silang duha sa Vatican’s International Theological Commission.

Karon nga nakahimo na og pangan sa aspeto sa pagtuo sa simbahang katoliko si Tagle, gipanlantaw nga di’ na lisud ang pagpatumaw sa iyang pangan panahon nga mopatawag og conclave (proseso sa pagpili og santo papa) ang Roma. Kining tanan, nahitabo sa usa ka nasud nga napuno sa mga trahedya ug ning bag-ong nabutang sa dakong kalibog kung angayan ba o dili ang giyera sa Mindanao human ang pagsiaw na ‘sab sa mga sakop sa MILF.

Email: [email protected] or [email protected]