Kalag sa gimasaker namalik?

Nabaniog nga mibalik ang mga kalag sa pamilyang Ponce sa gibiyaan nilang balay sa Palm View Village, Tabunok, Talisay.

Kini human magdungan og kamatay ang magtiayong Emmanuel ug Melinda Ponce, 3 nila ka anak ug 1 ka katabang.

Ang kamatuoran kunong namalik ang mga kalag sa mga nangamatay, kay mag-uwang kuno ang mga iro inigka-kaadlawon, may mohunong nga sakyanan, apan way makitang tawo ang mga silingan, ug uban pang kasagaran makapahadlok nga mga kasikas sa maong balay.

Sa pagkatinuod kun ang nakabasa sa Biblia mituo pa lang sa gipamulong sa Dios diha sa maong basahon, di man unta makagamot sa halos tanang tawo sa kalibotan ang pagtuo nga mabuhi ang kalag sa tawo inighuman niini og lubong.

Kay sa Biblia gipatin-aw man sa Dios nga ang kalag sa tawo mamatay dungan sa iyang lawas ug mabuhi lamang kini sa adlaw sa pagbalik ni Cristo.

Hinuon gitin-aw usab sa maong basahon nga ang kalag nga mabuhi sa pagbalik ni Kristo kadto rang mga kalag sa mga tawo nga iya ni Kristo ug sa Dios.

Apan ang mga kalag sa mga tawong di iya ni Kristo ug sa Dios mokuwenta una og usa ka libo ka tuig human sa pagbalik ni Kristo nganhi sa yuta una mabuhi ang maong mga kalag, apan di para langit kundi para sa impiyerno.

Ang kalag mao ang huna-huna, plano, ug gugma sa tawo nga mugna sa iyang utok ug kasingkasing.

Kumo kay ang utok ug kasingkasing bahin man sa lawas sa tawo, maoy hinungdan nga inigkabugto sa gininhawa sa tawo bugto usab ang utok ug ang kasingkasing, por-iso, buotan kaayo ang Dios sa pagtug-an sa tinuod nga inigkamatay sa lawas sa tawo, patay usab ang iyang kalag.

Hinuon ang giingon nilang mga natingad-an sa balay sa pamilyang Ponce, di kana mga kalag, kundi mga dautang espiritu.

Kay maldito kaayo ang dautang espiritu kay bisan si Kristo kaniadto gihamok og mga dautang espiritu sa usa ka dapit nga iyang gisuroyan sa dinhi pa Siya sa yuta. Di ba?