Sentenaryo sa CTU

CTU Campus, Sabang, Danao City—Malampusong napahigayon ang dakong piyesta sa libreng mga pangalagad dinhi atol sa 3rd Extension Services Forum and Festival. Mao ni labing una nga napahigayon gawas sa Cebu Technological University (CTU) Main Campus, diin gihimo ang unang duha. Ang ikaupat gisugyot nga ipahigayon sa habagatang Sugbo sunod tuig.

 Mao ni ilang bersiyon sa Halad sa Kapamilya sa ABS-CBN Central Visayas. Apan ako ang unang motahan sa ilang kaandam, ka-organisado, ka-determinado ug kamalukpanon sa pangalagad. Duna silay ilang kaugalingong mga kawani, mga tinun-an, kahimanan, luna ug katigayonan. Apan wa ning kapugong nila pakiglambigit sa ubang mga sektor aron pagtanyag og mas lapad pang pangalagad.

* * *

Ang labing gipunsisokan nga mga pangalagad, sama sa naandan, mao ang libreng medical ug dental services. Daghang pasyente ang naalagaran sa mga doktor ug libreng tambal gikan sa Danao City Health Department, Integrated Provincial Health Office ug pribadong mga doktor nga gipangulohan ni Dr. Aguilar, usa sa alumni sa CTU-Danao.

 Laing gitapokan mao ang local ug overseas job fair uban sa 28 ka local employers ug overseas placement agencies nga nitanyag og kaliboan ka kahigayonan sa trabaho. Nangalagad sab ang nagkalainlaing buhatan sa nasudnong gobyerno. Ug nipasundayag sa ilang labing lamiang mga pagkaon ug mapuslanong mga teknolohiya ang dagkong campuses sa CTU system.

* * *

Si Dr. Bonifacio Villanueva, presidente sa CTU, nipasabot nga mas takos na karon ang unibersidad sa pagtanyag sa mas gipadaghan nilang extension services tungod sa ilang kalamposan paghusay sa karaang mga panagsungi, paglig-on sa ilang pagtinabangay ug pagpalambo sa ilang kahimanan sa edukasyon.

Ang CTU may 3,500 lang ka tinun-an sa pag-asumir ni Villanueva sa kanhi Cebu State College of Science and Technology (CSCST) upat ka tuig ang nilabay. Nahimo silang unibersidad human lang sa duha ka tuig. Karon, ang CTU duna nay kapin sa 12,000 ka tinun-an. Matod ni Villanueva makatukod sila sa mosunod nga mga buwan og mas tag-as nga buildings sa main campus ug ubang campuses.

* * *

 Gawas sa iyang kabilin pagtukod og tulo na ka state universities, si Villanueva makaangkon sa laing talagsaong kadungganan: Ang pagduma sa kasaulogan sa ika-100 nga sumad sa tulonghaan. Nga pormal nga natukod niadtong Nobyembre 20, 1911.

 Apil sa dagkong kalihokan nga gilumbay pagtimaan sa sentenaryo sa CTU mao ang Grand Halad sa Kapamilya karong Nobyembre 12. Nga, alang nako, maoy labing haom nga gasa-pasalamat sa CTU ngadto sa daghang henerasyon sa mga Sugbuanon nga nagmatuto sa institusyon ug halad ug yukbo sa ABS-CBN ngadto sa katawhan nga nagsunod ug nagpaluyo sa iyang mga tulomanon ug sa usa sa iyang labing matinud-anon nga kaabag sa pagtanyag sa way kinutoban nga pangalagad ngadto sa labing nagkinahanglan sa atong mga kapamilya. 

* * *

Email: [email protected].