Traysikad sa coastal road sa Talisay city

Pila na lang sa akong mga ka-edad karon ang nakaila ni anhing diktador Ferdinand Marcos?

Natawo ko sa tuig kanus-a ubos sa martial law ang Pilipinas. Nagtubo ko nga ang akong mga ginikanan nagpuyo ubos sa balaod militar.

Suwerte akong mga ginikanan, akong mga apohan ug mga uyoan ug iyaan nga walay usa kanila nga nabiktima sa luog nga paglapas sa tawhanong katungod.

Suwerte ko nga niadtong mga tuiga, hilabihan pa kalinghod sa akong panghunahuna nga dili nako masabtan ug mabati-an ang kasakit sa mga tawong gi-abusohan sa pamunoan ni Marcos.

Apan maayong balikbalikon nato sa pagpangutana: Pila na lang sa akong mga ka-edad karon ang nakaila ni anhing diktador Ferdinand Marcos?

Diyutay na lamang kaayo sa mga bag-ong tubo karon ang nakaila kinsa si Marcos ug unsay kadaot nga iyang nahimo ngadto sa mga Pilipino.

Dili kini angayan ikaguol tungod kay sa among pagtubo, dili na ingon kalapad ang pag-apil sa leksiyon sa mga history subjects kalabot sa martial law ug ni Marcos.

Ang akong gikagul-an mao ang pagkamalimtanon sa mga maguwang pa nako og edad – kadtong mga hamtong na panahon sa martial law sa nasud. Hilabihan gayod ka-malimtanon sa mga Pilipino.

Ang pagkapili ni Bongbong Marcos, anak sa diktador nga parehas niya og ngalan, isip senador usa ka timailhan nga nahikalimtan na sa mga Pilipino ang luog nga binuhatan sa mga Marcos niadtong mga tuig nga ubos sa balaod militar pa ang nasud.

Ang maayong laki nga bise presidente nga si Jejomar Binay maoy nag-una sa mga Pilipino nga hilabihan ka malimtanon sa mga kapait nga nahiagoman niya ug sa parehas niyang mga human rights victims. Iyang giduso ngadto sa administrasyong Aquino ang hero’s burial ni anhing diktador Ferdinand Marcos.

Pero napikal ko nga naghunahuna nga mismo si Bongbong Marcos na mismo ang mipalit sa away tungod sa paghingpit sa desisyon ni Pres. Noynoy Aquino nga dili siya mohatag og military honors sa paglubong ni Marcos didto sa ilang lugar sa Ilocos.

Gisakyan ni Bongbong ang pagkamalimtanon sa mga Pilipino.

Sukad pa kaniadto ang panawagan sa mga Marcos nga mangayo og pasaylo sa ilang mga biktima. Apan sa Facebook post ni Bongbong, iya hinuong gisumbalik ang Malacañang nga papangayoon usab og pasaylo si Noynoy sa mga nahimong human rights violation sa iyang inahang si Cory Aquino.

Ibutang nato nga adunay mga human rights violation sa panahon ni Cory, apan walay direktang mando ni Cory ang pagbuhat sa ingon. Ang gibuhat ni Marcos pagpa-ubos sa martial law sa tibuok nasud maoy nakapalapad sa gahum sa iyang pamilya ug mga higala nga hasta ang mga inosente ug wala mahukming sad-an sa korte, gipangpriso ug adunay daghang gipamatay, sama sa nahitabo sa Sugboanong si Fr. Rudy Romano.

Pastilan, ang maayo tingale ani, ipaslak og una sa prisohan silang Bongbong ug iyang inahan nga si Imelda Marcos, ug atong isunod si Noynoy kun mapamatud-an nga aduna usab samang mga human rights violation sa presidency sa iyang inahan.

Kun dili mangayo og pasaylo si Bongbong sa mga sala sa iyang pamilya kay sa panahon ni Cory anaa usab kini mga salaa, dili na lang nato pugson.

Apan mag-anam-anam kita og edukar sa mga tawong wala na masayod sa kapait sa martial law ni Marcos ug mag-anam-anam kita og pahigmata sa mga nahikalimot na.

* * *

Nagkadaghan na ang mga traysikad nga anaa magdagan sa Cebu South Coastal Road sa dakbayan sa Talisay.

Ilabi na diha sa barangay Cansojong, makig-contest na ang mga traysikad sa mga sakyanan nga mangagi sa coastal road.

Makadaghan na ko makasinati nga ang traysikad makabalda sa flow sa trapiko, apan sama sa mayang bungol bisan sagunsonan pa og bosina aron padaplinon, dili gyud manumbaling.

Gitugotan ba diay sa kagamhanan sa dakbayan sa Talisay kining paghatag og rota sa mga traysikad diha sa South Coastal Road?

Kining traysikad dili kahimoan og balaod tungod kay illegal kini “per se” apan nagtuo ko nga mahimo kining kahimoan og regulasyon.

Tingale panahon na nga tan-awon sa konseho sa dakbayan sa Talisay kining biyahe sa mga traysikad sa south coastal road unya himoan nila og regulasyon mentras wala pay disgrasya nga nahitabo nga maglambigit sa drayber ug mga pasahero sa traysikad.

Kanus-a man diay molihok ang kagamhanan sa Talisay, unya na og aduna nay mangamatay?

Risgo gyud kaayo ang mga biyahe sa mga traysikad diha sa south coastal road sa Talisay ug angayan kining i-ban na.

* * *

Sa lungsod sa Minglanilla, nagsugodsugod na usab ang pipila ka traysikad nga molagbas gyud sa national highway sa Natalio Bacalso Avenue.

Kun sugdan kini og ban sa kagamhanan sa Minglanilla, dili kini makadaghan.

Kay kun pasagdan lang kini, mahisama kini sa suliran sa habalhabal sa Minglanilla karon.

Ang mga habalhabal nanaghan na pag-ayo. Ug ang nakaparat, kadaghanan sa mga habalhabal gimaneho og mga adik ug walay mga lisensiya, ug gipadagan nga walay mga rehistro.