Bati man ko

Kini ang kanunay nga isulti ni Adonis sa matag higayon nga dunay modayeg sa iyang kaambong pisikal. Kini usab ang matang sa mentalidad nga iyang gibitbit hangtod na sa iyang paghamtong. Wala niya hikit-i ang iyang kaambong ug wala niya hikit-i ang iyang katalagsaon. Ug mao kini ang gitawag pa ni Tara Bennett Goleman sa iyang libro nga Emotional Alchemy nga usa ka: DEFECTIVENESS SCHEMA o ang Schema sa UNLOVABILITY. Kini gumikan sa mga tawong giisip unta nimong mga Significant Others apan nagdumili nga ipasinati diha nimo ang imong kaanyag o kaambong nga tungod niini angay ug matarong lamang nga ikaw higugmaon. Ang kaanyag ug kaambong nga akong gipasabot dinhi dili lang ang pisikal nga matang kondili ang kaanyag nga nagasukad mismo sa imong pagka-ikaw ingon nga usa ka talagsaong tawo o lahi ra sa uban. Ang KAULAW ug KAHIUBOS mao ang emosyon nga nipatigbabaw ning matang sa mga tawo nga nakahupot ning maong schema gumikan sa mga insulto, pangyubit, ug pagpasagad nga ilang nahiagoman gikan sa ilang mga ginikanan, mga kaparyentihan, o dili ba kaha mga kahigalaan. Matang sa pagbati nga moresulta usab og KAPUNGOT sa kinabuhi ug sa kaugalingon. Mao nga daghan sa mga tawo nga nahisakop niini ang maglisod pagtagamtam sa usa ka relasyon. Kun duna man gani,dili nila ma-appreciate ang gugma nga gihatag kanila sa ilang hinigugma kay lagi sila bati man alang kang bisan kinsa. Angay nga buhaton kun ugaling ikaw ang anaa ning matanga sa pagbati ang moatubang sa salamin ug isulti nimo kini: “Usa ako ka Lahi nga linalang nga dunay kaugalingong kaambong ug kaanyag, ug ako mahinungdanong bahin sa tawhanong kalibutan.” Sa laktod: “You always remain beautiful even in ugly surroundings.”