Obenza iresponsable

Sa miaging semana gitulis na usab ang mga tagas nga opisyal sa usa ka prendahanan og alahas sa ilang pagtugpa sa dakbayan sa Lapu-lapu. Ang mitulis sa dala niining mga mahalong alahas mao ang mga armadong mga tawo nga nagpakaaron-ingnon nga mga sakop sa Philippine Drug Enforcement Agency o PDEA.

Ang maong tulis ikaduha na sa maong prendahanan og mga alahas sulod lamang sa unom ka bulan ug kini nahitabo diha gihapon sa dakbayan sa Lapu-lapu. Ang tulis nahitabo usab gihapon sa mga panahon nga ang kapolisan sa nahisgutang dakbayan gipangulohan sa ilang hepe nga iresponsable nga ginganlan og Anthony Obenza.

Si Obenza dili angayang himoong hepe sa dagko nga mga dakbayan kay siya iresponsable. Dili gani siya angayan nga himoong hepe sa usa ka lungsod. Hinoon mas haum siya nga himoong hepe sa mga tanod.

Nganong iresponsable si Obenza sa iyang pagka hepe sa kapolisan sa dakbayan sa Lapu-lapu? Una, wala pa gani siya mahuman sa iyang imbestigasyon, gani mao pay pagsugod nila aduna na dayon siyay resulta. Tulis me kuno ang nahitabo busa walay tulis. Ang responsabling hepe sa police dili maghimo sa gihimo ni Obenza. Mao ni ang hinungdan nga mitiyabaw ang biktima.

Ang responsabling hepe dili moluwat sa susamang pamahayag nga giluwatan ni Obenza bisan pa gani og daghan na siya’g natigom nga kasayoran unsa pa kaha kun pipila pa lamang ka podyot ang iyang nahipos?

Ikaduha ina kay magpaubos kay napakyas sa pagpanalipod sa butang sa biktima nga natulis diha sa iyang area, ang biktima na hinoon ang gibasol kay kuno wala magpahibalo kanilang mga police. Nalimot seguro si Obenza nga aduna usay mga polis nga tulisan.

Ang responsabling hepe dili mag escapegoat. Kay napakyas sa pagsulbad pinaagi sa pag-ila, pagsikop ug pagpasaka og kaso sa mga tulisan nga nanulis unom na ka buwan ang nakalabay, nausban na usab ang biktima. Seguro kay naglisod sa pagpasabot ngadto sa katawhan sa Lapu-lapu sa ilang mga kapakyas sa pagsulbad sa unang tulis, ang biktima na ang gidut-an sa mga pagbasol.

May natampo man tood ang biktima sa nahitabo kanila apan aduna upod silay rason sa paghimo sa ingon. Dili nato sila mabasol kun wala silay pagsalig sa mga polis ilabi na sa mga polis sa dakbayan sa Lapu-lapu nga gipangulohan ni Obenza.