Among-amongan

Tinuod maayo ang tawo. Apan dili usab ikalimod nga daghan kanato ang among-amongan kaayo. Gikan sa pag-among among sa pagbati sa tawo ngadto na sa atong kalikupan.

Ang nahitabong kadaut sa kinaiyahan linugdangan sa atong mapasagarong pagdumala kanila. Mao nga karon kita nag-antos. When we strike nature, nature strikes back.

Sama sa ebanghelyo nato karon, ang tag-iya sa parasan ang misalig sa iyang parasan ngadto sa mga saop. Ang mga saop sa laing bahin, ang wala mohatag og igong pagtagad sa maong kahimtang tali kanila ug sa tag-iya. Tinukmod sa dakong kahakog, ilang gipamatay, giamong-amongan ang mga sinugo lakip na mismo ang anak sa tag-iya.

Kun buot hunahunaon, wala kita’y ato bisan gani ang atong kinabuhi, dili man kita ang tag-iya. Mao unta kini ang magdapit kanato nga imbis isalikway ang tinud-anay nga mahinungdanon nga mao ang Ginoo sa atong kinabuhi ato siyang dawaton ug pasudlon. Ug sanglit, dili man kita ang tag-iya sa tanan nga ato karong nahuptan, atong likayan ang pag-among-among kanila. Hinunoa, ato silang palambuon.