Magkadaku ang madaug sa lotto, magkataas ang pila sa mga mamustaay, nanimpalad nga ma-instant millionaire. Ang imong kontra ma-3 ngadto sa 4 milyones ka lotto enthusiasts sa tibuok nasud. Sa ato pa, sa 4 milyones ka lotto bettors, naglaom ka ikaw ang mudaog.
Hope springs eternal. Walay kinutoban ang paglaom, maoy hinungdan nga matag adlaw, minilyon ka Pinoy ang maglinya sa libohan ka lotto outlets sa tibuok nasud, uban sa slogan nga “a quitter never wins … a winner never quits.” Busa, aron mudaog, kinahanglan mopusta ka kada adlaw, bahala nag di kapalit og panihaponon.
Giingon nga Filipinos love to gamble. Mao man gani hinungdan nga dunay mga sugyot nga himoon na lang legal ang gambling sa atong nasud, sama sa jueting. Niini nga paagi, modako ang buhis nga makobra sa gobyerno, inay nga ang mga gambling lords ray makasapi ug ubang taga gobyerno nga mao untay gitahasan paggukod ug pagsanta sa illegal gambling.
Lahi sa mga casino, ang jueting gi-design alang sa mga pobre. Busa, maayo ning hatagan sila sa ilang gusto. Apan, unsa may mahitabo? What about moral ascendancy? Ang pag-legalize sa sugal, giingon nga sama da kuno nga atong gidasig ang mga pobre to rely on luck or chance.
Maayo ba ni?
* * *
Quality education. Usa kini sa daku natong issue karong panahona. Maoy hinungdan nga pag-improve sa kalidad sa atong edukasyon, mao ang pagdugang og duha ka tuig sa pagtungha. Sa ato pa, dungagan og duha ka tuig ang elementary ug laing duha ka tuig sa high school.
Mao ba ni ang iksaktong solusyon? Ang mga bulok nga estudyante mo-bright ba kun dungagan og duha ka tuig ang ilang pagtungha?
Di ba mas maayo nga atong unahon pag-atubang ang mga suliran sa mga tunghaan, sama sa kakulang sa mga classrooms, kakulang sa tisas ug mga blackboard, kakulang sa mga textbooks, kakulang sa mga lingkoranan ug ubang kahimanan sa pagtungha, ug kakulang sa mga quality teachers?
Ug di ba makadugang usab kini sa problema sa nagbaguod nang daan nga mga ginikanan? Ug di ba makadugang usab kini sa gidaghanon sa mga school dropouts gumikan sa kawad-on?
Pastilan, aron lang gyud ingnon nga mas bright ang ato karong mga leader kay sa panahon sa unang administrasyon hinungdan nga maghimo sila niining maong kausaban pag-improve konohay sa atong quality of education?
Unya, ila pang tudloan ang kabataan unsaon paggamit sa condom aron dili manganak? Ug usbon ang pagbukas sa tingtungha gikan sa Hunyo ngadto sa Septembre , sama sa Amerika, nga kun buot hunahunaon, mora mag mas ting-uwan ang Septembre kay sa Hunyo ug Hulyo.
Ang labing daku nga suliran sa atong nasud, mao ang kawad-on, ug miingon si Noynoy nga walay mahirap kung walang corrupt. Now, makapawala ba sa kahirapan ang pagdugang og duha ka tuig sa pagtungha? O mawa ba ang corruption kun atong ibalhin ang opening of classes ngadto sa September?
Atong buot ipasabot dinhi, atong i-prioritze ang atong mga lakang. Ug atong tun-an og maayo ngano nga mius-os ang kalidad sa edukasyon sa atong nasud. Dili kay modiritso lang tag hasmag! Di ba, Dro?