Yuta ni Fr. Vicente Rallos

Pastilan, magka problema g’yud si court sheriff Antonio Bellones sa pagkobra sa iyang retirement benefits karon nga gipasakaan siya’g kaso ni Mayor Michael Rama didto sa Ombudsman-Visayas.

Duha ka kaso ang giatubang karon ni Bellones. Kini mao ang grave abuse of authority ingon man kalapasan sa anti-graft and corrupt practices act, apan hinoon wa malisang ang sheriff.

Kwestyonable g’yud hinoon ang gihimo ni Bellones kay tiaw mo, Septiyembre 26 nagpadala pa siya og demand letter ngadto sa kagamhanan sa dakbayan nga bayaran na ang pamilyang Rallos sa P133 milyones nga gi-award sa hukmanan.

Apan pagka-ugma pastilan, si Bellones mipadala na man og notice of garnishment ngadto sa upat ka bangko nga gidepositohan sa dakbayan sa Sugbo sa iyang kwarta.

Ang pag-isyu og notice of garnishment nagpasabot nga ang hukmanan nagpakisayud sa mga bangko kun pila ang kwarta nga deposito sa dakbayan sa ilang bangko.

Basi sa lagda nga ang maong mga bangko gihatagan og lima ka adlaw sa paghimo niini ngadto sa hukmanan. Ang pangutana, nganong gidali-dali man ni Bellones ang pag-isyu sa notice of garnishment?

Nakapaduda kini ni Mayor Michael Rama nga duna g’yuy mga tawo nga naninguha nga makakwarta niining maong transaksyon ug si Bellones apil nga gikatahapan. Kini ilabi na nga hapit na siya moretiro sa katungdanan. Matud pa nga si Bellones gikatakda nga moretiro na karong Oktobre 18. Tan-awa karon Mr. Bellones, nagka problema ka na hinoon.

Unsaon man nimo pagkobra sa imong retirement benefits nga nag-atubang ka na man og duha ka kaso diha sa Ombudsman? Husto ang gihimo sa huwes nga gidid-an na si Bellones sa pagpadayon paghupot sa kaso nga pagpabayad sa dakbayan.

Alang nako, samtang kining maong kaso nahuman na didto sa Supreme Court, angay kining buksan pagbalik.

Abi ninyo’g ngano? Dunay bag-ong ebidensya nga mitumaw nga nadiskobrehan ni kanhi Konsehal Jocelyn Pesquera nga dili usab angay nga ibaliwala. Kining karsada nga ang yuta gipanag-iya sa pamilyang Rallos, buot pabayran sa dakbayan kay gigamit man kini sa public purpose.

Dunay lagda nga mahimong ma-buksan pagbalik ang kaso kun dunay mga bag-ong ebidensya nga motumaw. Si Pesquera nakakuha og dukomento nga kaniadto diay’ng 1940, ang pamilya mismo sa mga Rallos nagkasabot nga kay lapad man ang ilang yuta diha sa barangay Sambag 2, magbuhat g’yud sila og karsada.

Ang maong karsada gamiton sa mga Rallos ug sa publiko mismo. Sigun sa dukomento nga gitawag og “Convenio” nga didto gipirmahan sa hukmanan, gilatid nga ang karsada idonar kini ngadto sa dakbayan.

Kun dili man gani dawaton sa dakbayan sa Sugbo, kay syudad na man ang Sugbo adtong tuiga, magpabilin kini nga panag-iyahon sa mga Rallos. Apan ang isyu mao nga karsada g’yud ang tumong sa mga Rallos.

Nan karon, nganong pabayron pa man nila ang dakbayan sa Sugbo nga gikasabotan na man sa mga sumosunod ni Fr. Vicente Rallos nga maghimo g’yud sila og karsada ug idonar ngadto sa dakbayan?

Awhagon nako si Mayor Michael Rama nga mopadayon sa pagpaninguha nga modaug ang dakbayan nga dili gayud kita makabayad sa gidemanda nga P133 milyones. Sayonan ka anang kantidara?