Pamilyang bayani

Dakila ang ama, dakila ang ina

kaya itong anak posibleng dakila;

Si Ninoy nang buhay hinarap na kusa

yaong kamatayang sa kanya ay handa!

At si Cory naman ay naging pangulo

sapagkat ginusto nang maraming tao;

May mga humadlang sa landasin nito

pero naging tapat doon sa Palasyo!

Kaya itong anak pangulo na ngayon

maraming problema ang sumasalubong;

Kung siya ay tapat bayan ay susulong

siya man ay magiging bayani ng nasyon!

Sa nilalakbay n’ya na tuwid na landas –

naroon sa dulo ang magandang wakas;

Sa kaliwa’t kanan ay maraming ahas –

sana ang tuklawin mga taong hudas!

Kung itong si Noynoy ay magpapatuloy

sa kanyang mithiing bansa ay isulong;

Pagsapit sa dulo ng landas na iyon

magiging sagana ang lahat ng Pinoy!

Marami na siyang magagandang hakbang

upang tayong lahat ay maging huwaran;

Kung magpapatuloy sa gawaing iyan

tiyak na gaganda itong ating bayan!

Isang taon pa lang siyang nakaupo

takbo ng gobyerno nagiging matino;

Mga nagrarali di siya ang palso

kundi gasolinang pahirap sa mundo!

Di man kumikilos – nagdaang rehimen

ay napahinto na sa maraming krimen;

Ang pagsisiyasat nasimulan na rin

sa ating militar at mga businessmen!

Kaya ang dakila’y nagiging bayani

di lang sa digmaang patay ang marami;

Sa kapayapaan ang mabuting hari –

saanman iharap ay kapuri-puri!