Hulagway ni Rama

Gikwestiyon ni Kongresista Tomas Osmeña ang paggamit ni Mayor Michael Rama og envelop nga dunay iyang hulagway.

Matud ni Osmeña nakalapas si Rama sa memorandum circular sa Department of the Interior and Local Government kon DILG hinungdan nga misang-at siya og kaso didto sa Ombudsman.

Sumala pa ni Osmeña nga gigamit ni Rama ang kwarta sa dakbayan pag-promote sa iyang kaugalingon.

Ang gihimo man gud ni Rama mao nga ang envelop nga iyang gisudlan sa hinabang alang sa mga senior citizen nagdala man sa iyang dagway og mubo nga mensahe.

Samtang tinuod dili husto ang gihimo ni Rama nga pagpahimulos sa higayon apan wa say dagway si Osmeña nga manaway tungod kay utro man pud siyang nihimo niini kaniadto.

Dili ba istilo man ni nila sa BOPK ang gikopya ni Rama?

Si Tomas misipra sa iyang mga hulagway ug pangalan sa mga sakyanan nga iyang gipamalit niadto.

Ang deperensiya lang kay envelop ang gibutangan ni Rama sa iyang hulagway ug pangalan samtang si Osmeña mga sakyanan.

Bilib hinuon ko kay sensitibo si Rama sa mga pagsaway ug daling mihukom pag-recall sa mga envelop.

Nahukman ni Rama nga inay iyang hulagway silyo na sa dakbayan ug sa konseho ang iyang ibutang sa sobre.

Hinaut nga sundon ang maong ihemplo sa ubang mga lokal nga mga opisyal nga nagpahimulos gihapon sa kwarta sa gobyerno pag-promote sa ilang kaugalingon.

Hinaut makapalit na og uwaw ang daghan pang opisyal nga mibandilyo sa ilang mga hulagway ug pangalan sa mga proyekto nga gigastohan sa kwarta sa mga magbubuhis.

* * *

[email protected]