Si Byron ug ang AK-47

Gitugyan na ni Byron Garcia ang iyang AK-47 nga armas ngadto sa mga police. Si Byron Garcia mao ang nagpasikat kaniadto sa dancing inmates nga naila sa tibook kalibutan ug igsoon sa gobernadora sa lalawigan sa Sugbo nga si Gwendolyn Garcia. Gitug-an ni Byron nga wala siyay permit to carry firearm pero aduna siyay lisensiya sa paghupot og armas.

Ang pipila ka buhatan sa gobyerno apil na ang kapolisan miapil na sa paghimo og pakisusi sa gibuhat ni Byron nga pagpanion sa iyang armas ngadto sa usa ka langyaw sa may Corona del Mar sa dakbayan sa Talisay.

Kun wa magreklamo ang langyaw sa gihimo ni Byron ug kun wala manion sa iyang armas ang naulahi dili gyod ta masayod nga naghupot diay og taas nga klase sa armas ang igsoon sa gobernadora. Ang atong pangutana nganong gitugotan man siya nga makakupot sa maong gitas-on nga klase sa armas?

Sigun sa akong nahibaw-an ang mga tawo gitugotan sa atong gobyerno nga makahupot og armas kun adunay hulga ang ilang kinabuhi pero kadto lamang ubos nga matang sa armas ang gitugot nga pahuptan nila. Pero ang armas nga gihuptan ni Byron Garcia diin aduna siyay permit, AK-47, taas nga kalibre sa armas. Nganong giisyuhan man siya og permit sa atong police sa paghupot ning maong matang sa armas, tungod ba kay igsoon siya sa gobernadora?

Sa reklamong pagpanion og armas diha sa dakbayan sa Talisay nakahinumdom dayon ko ni Dodong Joavan tungod kay iyaha man ugod kining forte. Pero human siya mahilom ug nagtinarong adunay bag-ong mikulit og pangalan nga posibling mohulip sa teritoryo ni Joavan ug labing seguro mao kini si Byron.