Wa nay mangilkil ha?

Nalipay ko kay nasulbad na ang problema sa kalangan sa sweldo sa mga traffic enforcers sa City Traffic Operations Management (CITOM).

Ang pag-aprobar sa Cebu City Council sa P473 milyones nga Monthly Operating and Other Expenses (MOOE) nga kabahin sa Supplemental Budget No. 2 ni Mayor Michael Rama maoy nakasulbad sa problema. Ang gikuyawan nako kay kun kanunay’ng malangan ang sweldo sa mga traffic enforcers daku kaayo ang kahigayonan nga dunay mga CITOM enforcers nga mangilkil gikan sa ilang madakpang drayber.

Ang CITOM dunay 289 ka traffic enforcers ug sigurado ko nga dunay pipila kanila nga mangilkil sa ilang madakpan. Dunay mga drayber nga mitug-an kanako nga sila biktima sa pagpangilkil.

Mobayad ang mga drayber kay aron dili sakmiton ang ilang lisensya ug mag-atubang og mas daku pa nga multahan sa paghimo’g kalapasan sa gilatid nga lagda sa tukmang pagmaneho og sakyanan.

Hala kay nasweldohan na man kamo mga traffic enforcers, trabaho na g’yud og maayo. Unta hunongon na ninyo ang pagpangilkil kay makaguba g’yud kini sa inyong dungog.

* * *

Miinsister g’yud si Mayor Michael Rama didto sa buhatan sa SM Prime Holdings Inc. nga angay g’yud sila nga mobayad sa ilang obligasyon ngadto sa dakbayan.

Giingnan ni Rama ang mga abogado sa SM nga kinahanglang mobayad usa sila sa dakbayan sa installment payment nila karong Oktobre. Ang argumento ni Rama mao nga wala pa ma-settle ang isyu nga ilang giapelar didto sa Bureau of Internal Revenue.

Alang nako husto usab ang argumento ni Rama kay angay lang nga i-withhold sa SM ang P109 milyones nga bayranan nila sa dakbayan kun may final na g’yud nga hukom ang BIR nga pabayron g’yud ang siyudad sa Sugbo og buhis sa pagbaligya niini og 30.4 hektareyas nga yuta sa SRP ngadto sa SM.

Apan maingon gihapon nato nga walay klaro kun mosugot ba ang BIR sa hangyo ni Rama kay gusto usab nila nga tan-awon og maayo ang papeles nga naglatid nga ang dakbayan sa Sugbo dili angay’ng mobayad og buhis kay gawas nga local government unit ang city, ang SRP accredited sa Philippine Export Zone Authority.

* * *

Atensyon mga beat reporters dinhi sa dakbayan! Magtigum ta karong udto ha adto sa Café Laguna sa Cebu Business Center alang sa general assembly sa Cebu Federation of Beat Journalists.

Gipahibalo ni CFBJ president Elias Baquero nga alas 12 sa udto sugdan g’yud dayon ang programa. Maglakip kini sa pagpanumpa sa mga opisyal sa lainlaing news beat ug sa CFBJ.

Daghan kami og giplano nga maayong himoon alang sa mga reporters nga sakop sa 11 ka lainlaing kahugpongan nga nag-cover sa mga buhatan sa kagamhanan.

Kita ta karong udto!

* * *

Ang P600 milyones nga budget alang sa pagmugna og duha ka flyover diha sa barangay Caretta ug Camputhaw, naglakip kini sa pagpalapad sa karsada.

Aron pagsulbad sa isyu maayo tingali nga unahon pagpalapad ang karsada diha sa dapit nga tukoran sa flyover, sama sa side roads total naa na man kaha’y budget sa road widening.

Maayo baya usab nga palapdan daan ang karsada pero diha lang sa palibut sa pagamugnaon nga flyover. Uyon ka ba niini Mayor Rama? Ayaw na lang usab pagdemanda nga apilon pagpalapad ang ubang karsada.