Tea time

Magpangita gyud ko og Tsa labi na kun mokaon na. Kay gawas nga pahilis ug palimpiyo adunay nindot nga itudlo ang pag-inom sa Tsa ug kini ang adunay kalambigitan sa atong tinguha nga magpailob taman sa ginhawa. Dili kini mahitungod lang sa Tsa kun dili sa panahon nga igahin aron lamang imnon siya.

Pait siya imnon mao nga ang uban mangita gyud og patam-is niya. Nagkinahanglan nga siya pabugnawon aron lamang siya mainom mao nga samtang siya gipabugnaw ikaw makigkukabildo una sa imong kuyog ug kun ikaw lang usa, ang mahilumong mamalandong o dili ba kaha maghanduraw sa nanglabay ug sa umaabot. Mahinungdanon gyud ang Tsa ug kay mahinungdanon man angay lamang gahinan og igong panahon.

Ang kadaghanan kanato kanunay nga magdali. Buot nato nga himuon ang tanang mga butang sa usa lamang ka higayon. Atong gihiklin ang naandang proseso sa bisan unsang butang gikan sa ginagmay hangtud na sa dinagko.

Ang nahitabo, anaa tuod apan dili pa husto ug kun sa luto pa hilaw o dili ba kaha overcook. Apil na niini ang relasyon. Dinalian, hikalimtan ang mga nindot nga butang sa atong kinabuhi ug sa tawo nga nahimong kabahin niini. Tungod sa pagdali-dali nga makita ang less complicated nga relasyon, atong i-junk ang kanhiay atong giisip nga seguridad. Only to realize, nga wala gyud diay kita katagamtam sa katabunok niini. Sa laktod, sige lang ta og sugod apan wala gyud kita’y natapos. Kun matapos man gani nato ang time-table, usa ka butang ang seguro wala kita ma-enjoy.