Si P.Noy ug ang mga guwapa

Daghan nang nakamatikod kang P-Noy nga basta nia siya sa Kabisay-an, sama sa Cebu, Bohol, Negros, o bisan asang lugar nga mayoridad sa sinultihan Sinugboanon, usa ra ang komon kaayo niyang introduction inigbarug niya sa stage.

Kini mao ang iyang yinungit nga pag-ingon nga "dinhi sa inyong lugar niadtong nangampanya pa ako daghang  guwapa , apan misamot na karon kadaghan ang mga guwapa dinhi sa inyo".

Nasinati ta niini tungod   matag higayon nga   nia siya sa Central Visayas , nagsunod ta kanunay sa iyang mga pagpanuaw sa mga lugar nga iyang bisitahon.

Apan diha sa maong introduction malingaw kaayo ang katawhan nga maminaw niini ug wala kitay nakita nga dautan tungod kay una sa tanan   ulitawo siya ug gusto lang niyang unahon pagdani sa iyang mga speeches ang kasingkasing sa mga babaye aron labing maminaw sa iyang sunod nga ipamulong.

Kay usahay ang weakness sa mga babaye mao nga dali kaayo kini maglagot ug makapanaway sa tawong mobarug sa ilang atubangan nga di kaantigo modayeg kanila, ug maayo kay na-estudyohan na kining daan ni P-Noy hinungdan nga suod kaayo siya sa mga babaye ilabi na sa mga daga sa mga dapit nga iyang duawon.

Sa matag pamulong usab niya ang komon kaayo niyang hisgotan inighuman niya og dayeg sa kababayen-an, mao ang girumbo karon sa iyang administrasyon nga mao ang korapsyon.

Dinhi makaingon ta nga inigkapupos   sa iyang termino kun may mautingkayan pang korapsyon sa nagkalainlaing ahensya sa gobyerno, nga wa alinggati sulod ning iyang pamunoan, ang magbuhat sa ingon atong pakpakan di tungod kay dayegon siya , kundi pakpakan aron ipabati kaniya nga ang kamot sa balaod wa diay malipat kundi nagpaniid ra diay kaniya aron patagamtamon siya sa silot nga angay ipahamtang sa mga tawong dautan sama kaniya. Di ba?