EDITORYAL - Ang balaod sa plastic bag

Kun mahingpit nang balaod ang Plastic Bag Regulation Act of 2011 mawagtang na ang mga plastic bag nga di madugta nga maoy uso karon.

Unya ipuli kadtong mga bag nga malata nga   gitawag kaniadto og bulsita.

Gani kanang sitio Villa Bulsita sa barangay Bulacao, Cebu City namugna tungod kay ang panginabuhi sa mga molupyo diha kaniadto mao ang pagpanggama og bulsita sa mano-manong paagi.

Ang ilang himoong bulsita mao ang mga sako sa semento nga malata nga ilang komprahon gikan sa mga konstruksyon ug piyesa-piyesahon aron himoong bulsita unya ipamaligya nila sa mga kamerkadohan.

Sa maong panahon wa kaayo makapalabad sa utok sa kagamhanan ang maong matang sa bulsita tungod kay di man kini makita sa   ilawom sa imbornal ug kanal nga mosagang sa hugaw ug makapabara sa tubig.

Maoy hinungdan nga bisan tag-ingon   lang og bitiis  ang gidak-on sa imbornal kaniadto, way bulsita nga makapabara sa hugaw sa ilawom niini busa way karsada nga nahimong suba.

Karon dagko-dagko sa bitiis og dyutay ang mga imbornal ning dakbayan apan tungod kay napuno sa plastik nga  di malata dinhi motumaw ang mga karsadang suba sa panahong mobunok ang uwan.

Inigpatuman sa balaod nga magdili sa paggamit og plastic nga di malata, dakpon na ang mga tawo nga masakpang mogamit niini ilabi na sa mga negosyante kansang baligya isulod sa plastic nga di malata.

Sa mao ra bang balaod gitahasan na ang mga opisyal sa barangay nga motabang sa pamolis aron pagsikop niadtong malapason.

Busa gituohan nga makatabang na usab sa panginabuhi sa mga kabus ang maong balaod kay mahimo ra man sa mano-manong paagi ang paggama og bag nga papel lahi sa   bag nga plastic nga makinarya ra sa mga milyonaryong negosyante   ang makagama sa maong matang nga bag.. Di ba?