Habal-habal

Gipamuslan nako ang higayon atul sa general assembly sa mga “habal-habal” drivers kagahapon diin dul-an sa 500 ang mitambong. Gikan sila sa Lahug, Busay ug Apas.

Nalipay ko kay kadaghanan kanila miuyon nga magmugna sila og kaugalingon nilang grupo, unya magpa-accredit sa barangay, dayon ngadto na sa City Hall.

Namasin kami si City Administrator Jose Mari Poblete nga sa pag-organisar sa mga habal-habal drivers maminus-minosan kun dili man g’yud masulbad ang problema sa mga abusadong drayber sa habal-habal.

Isip law enforcer sa Land Transportation Office (LTO)-Task Force Alpha ang mga habal-habal drivers akong gipasabot nga samtang ang kagamhanan andam mopiyong sa iyang mga mata sa ilang pagpamasahero, apan kinahanglang motuman sila sa balaud.

Gipasabot nako ang mga habal-habal drivers nga dili kami gusto nga manakop aron lang g’yud sila makabayad og dagku kaayong multa, apan usahay angay kini nga himoon aron pagtudlo og leksyon kanila.

Alang kanako, kamong mga drayber sa habal-habal walay problema kon mamasahero mo isip inyong panginabuhian apan mas nindot unta nga magdala mo kanunay og helmet para sa mosakay sa inyong motor.

Unya, kompletoha ang inyong kahimanan sama sa side mirrors, suga, ug nga dili expire ang rehestro sa inyong sakyanan. Bisan kini na lang ang inyong tumanon, dili na kamo dakponon.

Ayaw mo kahadlok sa mga sakop sa LTO nga mag-checkpoint kay dili man mangilkil ninyo og kwarta ang among mga deputized agents.

* * *

Si Mayor Michael Rama “dramatic entrance” kaayo sa pagsulod niya sa gym sa barangay Apas diin didto gihimo ang assembly sa mga drayber sa habal-habal.

Tiaw mo, nagsakay siya og motor, nag-helmet gikan sa ganghaan sa gym paingon sa atubangan aron mohatag og pakigpulong.

Nag-helmet hinoon si Mayor Rama apan ang kataw-anan, ang motorsiklo nga iyang gisakyan, walay “tail light assembly” kon suga sa luyo. Bitaw, ang buot ipasabot ni Rama sa pagsakay niya’g motor sa dayon na niyang sulod sa gym mao nga giisip niya nga kauban ang mga drayber sa habal-habal. “Estoryaheee!!

* * *

Akong gisugyot nga kinahanglang ipakwentas g’yud sa mga drayber og habal-habal ang ilang lisensya isip identification cards.

Sa ingon nga paagi mahibaw-an kinsa kadtong walay mga drivers license. Daghan man gud sa mga drayber sa habal-habal nga walay mga lisensya. Unya ang laing “concerns” sa mga pasahero nga maligo usab tawon mo nga mga habal-habal drivers uy.

Ang uban diha kuno pastilan nanimaho lang piot-piot. Maayo man gani nga magpahumot kun mag-drive. Kun moabut na gani ang panahon nga mag-drive ko og habal-habal, lupig gyud mo kay mag-perfume man ko kanunay. He! He! He!

* * *

Nalipay na ko sa sitwasyon karon sa dakbayan sa Sugbo nga mora’g duna nay oposisyon nga girepresentahan sa mga sakop sa konseho. Kaniadto, molusot lang ang mga transaksyon nga walay daghang kuskos-balungos. Bisan og dunay daghang kwestyonable walay mangutana kay pulos man sila kauban ra sa usa ka grupo.

Apan karon, tukion na g’yud pag-ayo ang mga isyu ilabi na kun maglambigit og dakung kantidad nga salapi. Mao kini ang maayo.