Ginhawa Delfin

Dunay drama kaniadto sa estasyon DyHP ang estasyon nga akong paminawon sukad pa gyud sa akong pagkabata. Ang ulohan sa sugilanon: “Ginhawa Delfin.” Dayon mosunod ang mga hangos ug singgit, hangos ug hangos. Nindot gyud diay ang ginhawa. Timailhan sa kinabuhi sanglit ang terminong Espiritu gikan man sa Griyegong pulong: PNEUMAH ug sa Hebreyong pulong: RUAH nga dunay emphasis sa “H” ingon nga haaah kon ginhawa. Sa ato pa ang Espiritu mao ang prinsipyo sa kinabuhi.

Sa laing bahin, dako kaayo og kahimoan ang pagbansay sa imong gininhawa. Ang Breathing Exercises (inhaling/exhaling) ang makatabang gyud og dako sa pag-normalize sa tensiyon sa lawas ug hunahuna. Ako kining nasulayan ug ako pud nga gipaambit sa uban nga moduol kanako aron mopaambit sa ilang siko-emosyonal nga kahimtang. Ang akong higala nga si Padre Jaque ang proponent sa expressive arts therapy dinhi sa atong Artsdyosesis ang nisugyot nga molakaw-lakaw gyud ang mga dunay gihambin sa dughan ug motan-aw og mga tanom nga berde uban ang paghanggab og preskong hangin. Kay ang paglakaw-lakaw makaalim man            usab.

Sa mga higayon nga ikaw mabalaka, maguol, maglagot, mahiubos, o ma-pressure gumikan sa mga responsibilidad o mga trabaho suroy daplin sa baybayon o sa bukid ug uban ang pagpiyong sa mga mata buhata kining sugyota: Inhale-exhale-inhale, exhale, inhale, exhale-relax.