May kapitan kaha ang barko nga nasunog?

Hangtod ning pasuwat wala pa gyod igkita ang kapitan sa barko nga nasunog ug nalunod dili halayo sa kadagatang bahin sa dakbayan sa Talisay, lalawigan sa Sugbo kaniadtong miaging Domingo. Ang pagkasunog ug pagkalunod sa fastcraft nga gipanag-iya sa Island Shipping Corporation mikalas og duha ka pasahero ug sa chiefmate niini. Ang barko gikan sa lungsod sa Tubigon sa lalawigan sa Bohol ug nagpaingon sa lalawigan sa Sugbo dihang kini nasunog. Faulty electrical wiring ang giingong hinungdan sa sunog.

Pila ka adlaw na lang ang milabay human masunog ug malunod ang barko nga gipanag-iya sa Island Shipping Corporation wala gihapon magpakita ang kapitan sa barko nga si Lucresio Canedo ug bisan mismo atol sa pagkasunog ug pagkalunod sa barko nga iyang gimaneho wala siya makit-i sa iyang mga pasahero.

Bisan sa pagduso sa marine protest wala magpakita ang kapitan sa barko. Mismong ang tag-iya na sa barko nga si Alex Tan ang nangunay sa pagduso sa marine protest. Hain man diay si kapitan Lucresio Canedo? Nganong dili man siya makit-an? Wala upod seguro siya mamatay kay wala man mataho nga adunay laing namatay sa nahisgutang hitabo. Nganong dili man siya igkita? Mao kahay mando sa tag-iya sa barko nga dili siya magpakita o ba kaha walay kapitan ang barko samtang kini naglabigar paingon dinhi sa Sugbo?

Mas maayo seguro nga apilon sa pagtan-aw sa mga taga Marina, Coast guard ug Special Board of Marine Inquiry ang pagkahanaw ug wala pagpatim-aw sa kapitan sa barko kay basin og naglabigar ang barko nga wala kini kapitan.

Kini ra bang maong senaryo dili bag-o kay kaniadto aduna ra bay kompanya nga nagpadagan og mga barko nga manghulam lang og kapitan sa laing barko aron sila makabiyahi.

* * *

22 ka mga Barangay dinhi sa Sugbo ang nakit-an sa mga taga COA nga migamit sa mga sakyanan nga dili alang sa opisyal nga kalihokan. Seguro wala lang makasabot ang mga opisyal sa Barangay unsay bUot ipasabot sa marka sa sakyanan nga "for official use only".

Seguro ang ilang pagsabot ning maong pahimangno mao nga ang mga opisyal ra ang makagamit sa mga sakyanan ug dili gamiton lang sa opisyal nga kalihokan. Sa laing bahin karon pa diay makadiskita ang mga taga COA niining maong practice sa atong mga opisyal?