Gawas nga ila nga gipakawalay bili ang ilang pagka-ulay, ang pipila sa mga dalagang Pilipinhon karon mas agresibo pa kay sa mga laki. Gani, ang mga laki nga wala makabantay sa pagka "hot" sa ilang mga uyab mao pa ang makabalibad sa ilang uyab nga dili lang una sila modimdim sa matam-is nga dugos sa himaya.
Dunay mga dalaga karon nga mosugot lang og ipaangkan basta makatilaw lang og kalibotanong kalipay. Bahala na og iyang anak sa pagpakasala maputos sa pagbiaybiay ug yagayaga nga siya anak sa liki nga kawayan. Bahala na ug di sila makahatag og husto nga edukasyon, sustansya ug bitamina sa iyang anak sa kaulag.
Dili sila makapangulipas ngadto sa atong yano nga panahom kay ang makuting pakisusi nga gihimo sa Population Commission (POPCOM) nagpakita nga ang 23 porsiyento nga nangamabdos sa tuig 2006 misaka ngadto sa 38 porsiyento.
Ang pangedaron sa miburos naggikan sa 15 anyos ngadto sa 25 anyos. Hapit na moabot ang panahon nga ang mga babaye mao nay manguyab sa mga laki.
Gani, matud pa sa ubang tigpaniid nga miabot na kini sa ubang dapit sa nasud. Nasayran nga ang usa ka nakapaagresibo sa babaye mao ang ilang kasayoran nga ang ratio karon sa babaye ug laki 1:10.
Matud pa sa Department of Health (DOH) nga ang pagsabak sa linghod nga pangedaron dili maayo. Kay may purohan man nga ma infected ang ovary sa babaye. Matud pa ni Economist Robert Mathus ang pagdaghan sa atong populasyon dili sab makaayo sa atong nag-ilaid na nga nasud. Kay dali ra man unya nato nga mahurot ang atong kinaiyanhong bahandi.