Tinguha sa Hunta Probinsiyal sa Sugbo ang pagdili sa mga law-ay nga basahon ug hulagway diha sa mga tabloid hinungdan nga ang besi gobernador nga si Agnes Magpale mipalabang sa “Anti-Tabloid Ordinance.”
Ang maong balaudnon napasar na sa first reading niadtong Lunes ug tumong kuno niini nga did-an ang operasyon sa tabloid sa probinsiya. Agi og salingsing sa maong balaudnon, si Bokal Teddy Ouano sa dakbayan sa Mandaue misugyot sab nga ilakip sa pagdili ang mga bastos nga drama sa radio.
Way lalis maayo ang motibo sa ilang tinguha apan ang pangutana nganong gi-single out ni Magpale ang tabloid? Kun law-ay ang hisgutan way makatupong sa law-ay nga mga pasundayag sa telebisyon.
Kun accessibility sa mga bata ang hisgutan mas dali nga makit-an sa mga bata ang bastos nga mga pasundayag sa telebisyon kay sa mga nobela diha sa tabloid. Pila ra man ka bata ang mopalit ug mobasa og tabloid? Samtang ang telebisyon hapit tanang pinuy-anan duna niini ug dali nga makit-an sa mga bata.
Nganong dili man kini maoy ilang unahon nga mas dako ni og kahigayonan nga maka-impluwensiya sa mga bata? Tan-awa gud ang salida sa telebisyon, bisan ang mga game show dunay mga dancers nga hapit nalang maghubo samtang nagbikaka atubangan sa kamera. Mas grabe ni diba? Apan nganong wala man ni ilakip sa hunta probinsiyal?
Alang ni bokal Ouano, kun dili lang ni hilas-hilas ang iyang sugyot nga ilakip ang mga drama sa radio, nganong niadtong siya pay mayor sa dakbayan sa Mandaue nanguhong man ang mga balay kahilayan?
Dili ba mas law-ay ug klarong illegal ang operasyon niining mga establisamento kay sa iyang giingong bastos nga drama sa radio? Nganong wala siya kapasira sa mga bars sa Mandaue kaniadto ug hangtod karon?
Ang akong punto mao nga mas maayong unahon sa atong mga opisyal ang klarong illegal kay sa niining dako pa kaayong lalisonon ug dili ba sila makahimo og kalapasan sa Batakang Balaud sa ilang ordinansahon.
Ang Integrated Bar of the Philippines Cebu City Chapter pinaagi ni manlalaban Earl Bonachita miingon nga kalapasan sa Bill of Rights nga gigarantiyahan sa Constitution ang “Anti-Tabloid Ordinance” tungod kay mo “constitute” ni og “prior restraint.”
Sa ato pa imo nang gipugngan daan ang paghimo sa usa ka butang bisan dili pa sigurado nga molapas ni sa balaud.
Ang pagban sab sa mga tabloid usa ka dakong isyu nga naglambigit sa “freedom of the press” nga sa gihapon giprotehian sa atong balaud.
Dili kinahanglang magsunod-sunod ang hunta probinsiyal sa mga lakang sa mga epokrito nga mga sakop sa Cebu City Anti-Indecency Board kun CAIB nga nanggukod sa mga tabloid kay kuno bastos apan naay klaro nga namaligya og unod sa daplin sa kadalanan wala nila badlonga.
Naa pay klaro nga mga balay kahilayan nga gigamit isip mga prostitution den nga wala nila mabadlong. Nganong dili man kini maoy ilang gukdon? Tungod ba kay may probitso sila nga makuha niini kay sa mga tabloid?
* * *