Batasan gyud nako nga kun dunay haya nga akong adtoan, ako gyung tan-awon ug hikaphikapon ang lungon nga gihigdaan sa minatay. Akong gambalayon diha sa akong nagduhiraw nga imahinasyon ang ako mismong bayhon nga naghigda ning lungona. Hinuon, dili kini panunglo kay sa madugay o sa madali adto man kitang tanan padulong.
Ang kamatayon maoy nakapaamgo kanatong tanan ning mosunod:
1. Mubo ra gyud ang panahon ug kay mubo man angay lamang tilukon.
2. Dili sa tanang higayon, nindot ang kinabuhi dunay mga higayon nga wala’y lami kini puy-an ug apil na ang kamatayon ning maong mga kamatuoran.
3. Ayaw paabota ang imong kamatayon una pa nimo ikapakita ang imong gugma sa imong kaugalingon ug sa imong isigkaingon.
4. Ang kamatayon maoy mosalamin kun giunsa nato pagpuyo ang atong kinabuhi.
Akong gisud-ong ang akong mga libro ingon man ang pipila ka mga gamit nga dunay kalambigitan sa akong kinabuhi ug pagkinabuhi dinhi ako nahinumdom nga kawang lamang diay ang tanan...kawang tungod kay wala kay madala bisan usa sa imong lubnganan, kawang tungod kay wala mapuy-i ingon sa angay, ang kalipay nga padayon mong gipangindahay...ug ang lungon pahinumdom kanimo ug kanako nga ang kinabuhi saulogon sa paagi nga malambigitan.