Estoryang kataw-anan

Mahiligon gyud kita sa mga kataw-anan nga sugilanon. Kini aron magpalabay sa oras o dili ba kaha aron atong matabunan o makalimtan ang bisan unsang gihambin nga pagbati.

Apan dili tanang mga sugilanon bisan pa man kun nakadalit kanato og hinanaling bahakhak ang maisip natong alibyo sa atong kasakitan.

Adunay kataw-anang mga sugilanon nga nahimong usa ka dakong sagpa alang kanato. Husto gyud ang text ni Meloy: “Jokes are more genuine than the promises ‘cause jokes are half-real while promises are half-lie.” Sige ta og katawa kay nahimuot ta nga dunay gikataw-an.

Apan ang wala lang nato usahay hisayri nga kita mismo ang nahimong gipunting sa atong mga pakatawa. Nahimo kitang kataw-anan gumikan sa atong tawhanong kakulang apan gipasiatab nato nga kita nga maayo ug hingpit nga mga tawo.

Nahimo na kitang kataw-anan tungod kay gihimo natong sukaranan ang mga bakak kaysa matuod. Nahimo kitang kataw-anan kay buot natong talikdan ang tinuod nga dagway sa tawhanong kalibutan.

Nahimo kitang kataw-anan gumikan kay ang kinabuhi mismo usa ka dakong kataw-anan. Mao nga daghan nato ang nagtakuban.

Daghan nato ang buot magpabasa sa bunok sa ulan bisan dunay payong gibalon aron dili makita sa uban ang luha nga mitubod gikan sa atong mga mata nga sa kanhiay nahimong migilaw sa dili tinuod nga kalipay.