Please don't quit smoking!

Mao kini karon ang gilaraw sa Aquino administration, kini tapus sa 18 ka buwan gikan sa paglingkod ni Noynoy pagka-Presidente. Kadto diay konong election pledge nga walay bag-o ug walay pagpataas sa buhis, that was only good for 18 months. Ug sa sunod tuig, iniglapas sa 18 months, makapasaka na sila sa buhis sa dili pagsupak sa ilang gisaad nga no new taxes. Maayo sad!

Ug ang una nilang pasakaan og buhis mao ang sigarilyo … kining ilang gitawag nga sin taxes. Hinoon, personally, di kaayo ko maguol ini, kay wa man ko magpaulipon sa sigarilyo. Apan, daku kining problema niadtong mas nahigugma sa sigarilyo kay sa ilang asawa. Kining giingon nga “they’re killing themselves softly.” Die hard kaayo ni silang lumalaban ug sumosunod, ug andam magpakamatay alang sa Fortune Tobacco Corporation ni Lucio Tan ug sa imported nga mga sigarilyo sama sa Philip Morris.

Sa ilang estimate, sa unang tuig sa implementation sa sin tax measure, mokita kono ang atong gobyerno as much as P19 to P20 billion. Maayo sad. Niining higayona magpasalamat kita sa mga hinigarilyo. Sama sa mga overseas workers, ato usab silang maisip nga mga modern heroes.

Mao nga ato silang awhagon sa dili pagbiya sa panigarilyo, aron ma-realize kining dugang daku nga income sa atong panudlanan. Sa ikaduhang tuig, gibanabana nga mo-income kita’g P30 to P40 billion; P40 to P50 billion sa ikatulong tuig, ug P60 to P70 billion sa ikaupat nga tuig. 

Lagmit ma-realize gyud ni tungod kay nagkadaghan ang nanigarilyo karon, lakip na ang kabataan ug kababayen-an. Kanilang tanan, daghan kaayong salamat! Please don’t quit smoking!

* * *

Sa among panahon, ambut unsa ra ning Korea. Apan, karon, bisag dili kaayo sila kamaong mo-Inenglish, adto na ta manghuwam nila. Ang Bangko Sentral sa atong nasud, mi-approve sa $13.3 million loan gikan sa Export-Import Bank sa South Korea. Kini, alang sa mga navigational equipment sa Lagunidingan airport development project sa Misamis Oriental.

Mao ni ang akong giingon nga kining atong nasud, dili makapalihok og mga dagkung project kun di ta manghuwam gikan sa gawas. Hinoon, wa may kaso nang manghuwam, kay bisan gani ang America daku man kaayo’g utang.

Apan, ang nakapait lang kay way klaro ang paingnan sa salapi, ug ang matag Pilipino, lakip kadtong wa pa matawo, maputos na sa utang. Ambut pila na ka trillion pesos ang atong utang … diin man ni paingon kwartaha, nga nag-trisikad man gihapon ta, nag-habalhabal, nag-ukay-ukay, nagsalig sa mga surplus nga sakyanan ug mga second hand nga mga auto parts?

Diin man paingon ang gihuwaman natong kwarta nga misamot man tag kaalaut, nagkadaghan ang gigutom, ug misuyla ang gidaghanon sa mga walay trabaho? Pangutana lang, Dro! Wa ko mamasangil nimo.