Luyo unya sa akong katawa

Sa nahimugso ang Bisrock, paborito nako ang bandang Missing Felimon kini tungod kay ang ilang mga kanta alang kanako dunay unod ug dunay kahulogan. Sa laktod, relevant kaayo.

Usa sa mga kanta nga nakahatag nako og igong pagtagad mao ang kanta nga Suroy-Suroy. Tipik sa mga linya niini ang nagkanayon: “Luyo unya sa akong Katawa Tan-awon ta og May kalipay Ba!” Tinuod daghan kanato ang dako kaayo og bahakhak ug daw sa mabitas ang atong baba sa pagngisi.

Apan luyo diay sa maong talidhay anaa ba kaha ang kalipay? Daghan kanato ang wala mahimutang padayong nangita sa kahulogan ug padayong nipanday sa kinabuhi. Adunay mga relasyon nga giungkag sa dili permanenteng pagbati.

Daghan ang nangita og lingaw-lingaw aron hubgon ang kaugalingong kaguol sa pamasin nga kini dili na mobalik. Apan lisud pun-on ang haw-ang nga pagbati. Lisud hulipan ang dapit nga kanhiay nahimong salag sa mabulokong kinabuhi. Mao nga padayong nangita ug nangita ang tawo sa iyang kalipay.

Lisud sabton ang tawo ug labaw nga lisud sabton ang kahulogan sa naglakaw-lakaw nga katawhan sa IT Park ug dili kaayo masabtan ang kahulogan sa matam-is nga parayeg sa mga managhigugmaay sa komplikadong gugma sa may BO’s Coffee ug Ilaputi. They have the right love at the wrong time. Mao nga ang gugma nga usa ka normal nga pagbati, nakapahimo sa usa ka kinabuhi nga abnormal nga panaw.

Ang mga talidhay nailisdan ug dalugdog ug bunok sa ulan. Si Aldong ang nituyo pagpaulan aron dili hikit-an ang mga luhang mitubod sa iyang mga mata gumikan sa pagbiya ni Amorvida aron makalingkawas sa komplikado nilang kahimtang...nga bugtong Dios lamang ang makasabot sa numerong 5254.