EDITORYAL - Ang taspokang ginikanan

Ang kalisud sa panginabuhi ug kawad-on maoy gihimong katarungan sa pipila ka ginikanang nadakpan sa mga otoridad dihang nasakpan sila nga maoy nangunay sa pag- cybersex sa ilang mga anak.

Hinuon di daghang ginikanan ang ingon ka mananapon og konsensya sa mga inahan o kaha amahan nga nagsilbi nang “bugaw” sa ilang kaugalingong anak.

Ang maong matang sa mga ginikanan gusto nga himoon nilang gatasan sa ilang panginabuhi ang kinitaan sa lawas ug dungog sa ilang mga anak .

Daghang nangutana kun unsay motibo sa maong mga ginikanan, apan bisan unsaon, usa ra ka butang ang anaa sa huna-huna sa kadaghanan, nga mao ang kataspokan sa maong matang sa ginikanan.

Sa Biblia, gisugo sa Dios ngadto sa iyang mga anak, nga kutob sa tawong tapolan, di angayang pakan-on ug pasagdan siyang maghago kay sa singot sa iyang agtang kinahanglan mokaon siya og tinapay ug mabuhi.

Kun ang mga ginikanang taspokan , padasigon pa sa pagpadaghan og anak, pagkamakaluluoy sa ilang mga anak kansang lawas ug dungog ibaligya aron lamang may masubad ang taspokan nga ginikanan.

Unsa may kaugmaon sa mga anak kansang kasinatian sa pagkagusbat sa moral naghatag og makalilisang hisgotanan sa kasaysayan sa iyang kinabuhi nga sukad pa sa iyang pagkabata giunay ra sa pagbuong sa mangtas niyang ginikanan.

Ang normal nga ginikanan, sa pagkatinuod “possessive” ug “conservative” nga kun mahimo palang nga walay maibog ug di usab maibog og opposite sex ang ilang anak, mao untay pabor kanila gumikan sa pagkaseloso og hunahuna niini.

Apan ang mga ginikanang may pagka-hayop og hunahuna mao pay molawog sa ilang mga anak babaye ngadto sa mga lalaki ug di nimo masabtan unsay matang sa kinaiya ug konsensya ang anaa kanila. Di ba?