Ang opisyal nga maayong pakpakan

Maayo ning timan-an sa mga lider sa gobyerno nga initon og ulo unya gaanon og kamot nga dali kaayong makabakyaw batok sa ilang isigkaingon nga makasala, kay basta di lang moreklamo ang imong gikulata, ok ra man diay ang DILG.

Sa ato pa hayahay diay ang mga opisyal nga ubos sa gahum sa DILG no, kay way makatarog sa ilang pagkatawo ug katungdanan bisan gamiton nila kini nga hustisya batok sa ilang mga sakop nga makasala basta ang hingtungdan magpakahilom lang.

Wa diay silay matawag nga internal policy niana, murag ang maimbistigar lang ug masilotan bisan way kihante mao ang mga opisyal ug kawani sa gobyerno nga mangawat sa kuwarta sa kagamhanan.

Kay diha niana abtik kaayo ang Ombudsman sa paghimo og lakang bisan kun ang anomaliya igo lang napatik sa pamantalaan ug wa makaabot nga opisyal ngadto sa ilang buhatan.

Ang mga polis mao usab no, kun ang NAPOLCOM di makadawat og reklamo gikan sa tawong gipakasad-an sa   usa ka polis, libre gihapon ang polis.

Labaw na ang korte, di gyud makahimo og lakang kun way kaso nga masang-at sa ilang buhatan kalabot sa krimen nga nahitabo sa sosyidad.

Ang mando ni Senate President Juan Ponce Enrile nga pahamtangan og silot administratiba ang mayor sa dakbayan sa Davao nga nangulata og opisyal ra usab sa gobyerno, sama ra diay to sa paghot sa usa ka iro ngadto sa buwan. Kay ang DILG nanghunaw man, nga di sila makapahamtang og silot sa maong mayor kay wa man mokiha ang gikulata.

Busa ang mga opisyal sa gobyerno nga ingon niana maayong abibahan, pakpakan ug duyanon sa iyang mga supporter tungod sa dalaygon niyang buhat.

Di kaha kini sundogon sa ubang mga opisyal sa gobyerno? Di ba?