Laing hinungdan pagnihit sa bugas!

Ang atong kagamhanan nakaayon lang gyud sa kanunay natong pagpamalit og bugas gikan sa gawas, bisan niini karong administrasyon ni Noynoy nga maoy atong gilauman nga makapahaw-as kanato gikan sa kalisud ug kagutom.

Pakyas ang Department of Agriculture, ug ang National Food Authority, mao ray abilidad ang pagpunay’g palit og bugas gikan sa ubang kanasuran.

Laing hinungdan sa kakulang sa bugas, mao kining atong pagkausikan. Atong makita sa kaugalingon natong mga panimalay nga daghan kaayong mumho ang mahibilin sa mga plato ug magkatag sa lamisa. Ingonman sa mga kan-anan, bisan pa sa mga mahalon nga restaurant, atong makita ang pag-usik-usik sa pagkaon. Gikwenta nga tons upon tons of rice ang mausik matag tuig, kini taliwa sa kanihit sa pagkaon. Sa ato pa, kun nagnihit ang atong pagkaon, dili kini tungod sa population, nga maoy buot sulbahon sa RH Bill, kundili, gumikan sa atong pagkausikan. Unya, mangutana dayon ta kun nganong gutom ang mga Pinoy.

Laing hinungdan sa rice shortage, mao kining ilang giingon nga land use conversion. Hectares upon hectares of rice fields ang karon gihimong eco-tourism hubs, residential areas, mga subdivisions, ug industrial zones. Sa 6 milyones ka ektaryang uma, karon 4 milyones na lang ang nahibilin. Sa ato pa, 2 million hectares of rice lands ang nahanaw.

Si Edna Velarde, researcher ug paralegal staff sa Sentro para sa Repormang Agraryo sa Quezon City, nagkanayon: Palay is more than a grain of food. Every part of the crop is a source of life. The straw can be used for thatching and mat-making, the fodder for animal feeds and the husk for fuel.”

Apan, unsay atong gihimo sa tabunok natong mga rice fields? Aduna bay programa ang Noynoy administration pagtubag niining maong suliran sa rice shortage, gawas sa rice importation?

* * *

Adunay pangutana kun nganong makapatuyang ang mga oil companies pagpataas sa presyo sa oil products. Tubag ni Senador Serge Osmeña: “There is no law that limits the margin of profits of oil companies in the country and allows the government to punish overpricing.”

Sa ato pa, walay balaud nga nagbuot kun pilay iganansiya sa mga oil companies, ug walay balaud magsilot kun ila kining i-overprice. Sa laktud nga pagkasulti, wa gyud tay dag-anan sa mga oil companies.

Ug kun ato kono silang piuton ug regulahon ang pagpadagan sa ilang negosyo, walay makapugong kanila, pagbaligya sa lana ngadto sa ubang kanasuran, sama sa gamhanang China.

Ang ato ra gyung mahimo mao ang pagpahugot some more sa atong hugot na kaayo nga bakus. Di ba, Dro?