Mga mapahitas-on gikasilagan sa Diyos

CEBU, Philippines - Usa sa daghang mga kinaiya ug batasan sa tawo nga gikasilagan sa Ginoo mao ang iyang pagkamapahitas-on. Ang Diyos gusto gayod nga ang tawo magmapahiubsanon. Kay wala sa usa ka Kristohanon ang pagka mapahitas-on. Kinaiya kini sa mga tawo nga yawan-on. Kun ang pagkamapahiubsanon mao ang atong istoryahan, tingali wala nay molabaw pa sa atong Ginoo.

Sa iya lang nga pagkatawo daan mitugot na siya nga anha lang magpakatawo sa pasungan sa baka. Bisan sa iyang pagka-anak sa Diyos kansang gahom sa langit ug yuta gitugyan na sa Amahan diha sa iyang mga kamot, si Kristo mitugot gihapon nga bunyagan ni Juan Bautista pinaagi sa tubig aron sa pagtuman sa kasulatan.

Tungod sa kahimuot sa Diyos sa gibuhat nga pagpaubos sa iyang anak, kalit lang nga naabli ang langit ug may salampati nga mibatog sa ulo ni Kristo ug unya may nadungog nga tingog "Kini ang pinalangga ug bugtong kong anak, Kaniya may kalipay ako."

Daghan pa kaayo ang mga ehemplo diha sa Balaang Kasulatan nga nagbatbat sa pagkamapahiubsanon ni Kristo. Suma pa sa Balaang Kasulatan nga bulahan ang magpaubos kay ang magpaubos ipataas, ug ang magpataas, ipaubos. Naangkon ni Lucifer ang kaparotan sa diha nga nangandoy siya nga molabaw pa sa Diyos.

Hilabihan kasakit ang iyang kaparotan kay sinaligan gud siya sa Diyos ug maoy labing ambongan sa tanang mga anghel sa langit kaniadto. Apan, si David, Joseph ug Saul nahimong mga dagkong tawo sa Israel ug Ehipto tungod sa ilang pagpaubos. Si David ug Saul nahimong hari sa Israel. Samtang si Joseph nahimo nga ikaduha nga labing gamhanan sa Ehipto, ikaduha lang sa Pharaoh. Hinoon, si Hari Saul sa Ehipto gihukasan sa iyang sapot sa pagkahari sa diha nga wala na siya motuman sa kasugoan sa Diyos.