Ang SOCA ni Mike

Ang SOCA ni Mayor Mike Rama gipaabot sa mga magbubuhis sa dakbayan sa Sugbo ug wa kinahanglana nga ipabati kini sa iyang mga kontra sa politika.

Angay niyang ipadayon nga maisogon ang maong tahas pagpahibawo sa mga tawo sa dakbayan nga iyang giserbisyohan ug di alang sa mga kaaway niya sa politika.

Mahinungdanon sa mga tawo ang mga plano sa mayor aron masuta nila kun angay ba silang mo-abuso kun anaa sila sa mga kalapasan sa balaod o mosanong ug mosabot sa hustong panukdanan sa balaod nga ipatuman sa usa ka lider sa gobyerno sama kang Mayor Rama.

Ang mga eskuwater angay magpaabot sa lider nga mopadasig kanila sa pagpuyo sa mga luna nga di ipa-eskuwat sa gobyerno.

Apan sa mga lider nga mopatuman sa tukmang balaod ug mo-edukar sa katawhan sa hustong balaod nga di pamolitika, may mapaabot ang katawhan gikan niining maong matang sa lider.

Ang ilang edukasyon bahin sa paglikay pagpang-eskuwat, ikatudlo nilang tinarong nga way kabalaka sa ilang mga anak.

Lahi kun tudloan ka sa pinolitikong paagi, kay padasigon ka sa pagpapuyo sa mga yuta nga di imo, bahala ka kun unsay imong dangatan kun lain na usab ang administrasyon.

Sa laktod ang mga politikong maldito, maayo lang mobulatik sa mga tawo aron moboto kaniya, apan sa kaulahian ang mga tawo maoy makaluluoy kay inigpuli sa usa ka lider nga may hustong prinsipyo sa pagpatumang higpit sa balaod, itudlo kanimo ang husto, bahala na og masakitan ka basta makakat-on ka lang sa husto.

Ang usa ka lider nga tinuod, way angay kabalak-an kun mawala sa katungdanan sa panahon sa eleksyon, basta gihimo lamang niya ang maayo ug inantigong paagi sa pagdumala sa mga magbubuhis, di siya makonsensya, kay ang tawong makonsensya mao lamang kadtong daghan og anomaliya nga motulisok sa iyang tanlag kun wala na siya sa katungdanan, di ba.