Kolurom nga boarding houses

CEBU, Philippines - Nakamatikod siguro mo nga nagsunodsunod ang insidente sa sunog dinhi sa Sugbo bisan paman ning panahon sa ting-uwan. Sa ato pa, dili gyud diay angayang mokompiyansa sa posibleng sunog nga mahitabo bisan paman pirming gabunok ang uwan.

Kun buot baya untang subayon dako kaayo ang kahigayonan nga atong malikayan ang sunog ning panahona kay dili uga o mala ang atong mga panimalay sanglit pirmi man kining mabasa sa uwan.

Niadtong milabay nga mga adlaw dunay sunog sa Sambag 1 diin ubay-ubay intawn nga panimalay, boarding houses ug gani lakip na ang akong alma mater ang Southwestern University napagan na usab sa maong sunog.

Kun inyong kahinumduman nasunog kini niadtong October 2010 apan wala didto magsugod ang kalayo kundili sa mga tapad niining mga kabalayan. Gisundan dayon kini og sunog sa Mabolo diin daghang mga pamilya ang nawagtangan intawn sa ilang panimalay.

Subay sa akong nahisgotang sunog sa may Urgello, Sambag 1, nasota sa hepe sa Cebu City Fire Department SR SUPT ADERSON A COMAR nga daghang mga boarding houses ug dormitoryo nga wala mosunod sa gilatid sa Fire Code of the Philippines ug gani bisan paman sa wala pagtuman niini nagpadayon gihapon ilang operasyon.

Matud pa ni Sr Supt Comar, “kung dili gihapon sila mopatuo, angayang kining panglatoson aron gyud mapugos sa pagtuman kay alang raman kini sa kaayuhan sa tag-iya sa mga boarding house ug sa mga estudyante nga mi-abang niini.”

Apan kun atong subayon, daghang mga boarding house dihang dapita nga walay permit nga nag-operate isip paabanganan. Tungod siguro sa kalisod sa panahon, mga pribado kining panimalay nga gihimoan og dugang mga lawak aron paabangan para pud pangdugang sa income.

Wala man ko'y nakitang problema diha ba, tinuod lisod gyud ang panahon karon maong kinahanglan kitang manikaysikay. Apan akong awhag sa mga nagpaabang, siguradoha ninyo nga luwas sa sunog ug dunay saktong mga fire exits ang inyong gipaabangan.

Sa pagka tinuod kining mga nag operate og dormitoryo ug boarding houses nga walay business permit, dili gyud kini sila ma-inspeksyon sa atong kabomberohan kay magbase man kami sa mga listahan sa tanang establisamentong mikuha og mibayad og business permits.

Manghinaut lang kita ug nanawagan sa mga nanag-iya niining mga boarding houses nga atong matawag og kolurom hatagan unta ninyo og igong pagtagad ang fire safety sa inyong mga gipaabangan.

Sa katapusan akong pahalipayan ang tanang mga amahan sanglit ugmang adlawa mao man ang Fathers Day. Sa akong amahan J/SUPT WALDIMAR VILLANUEVA ug sa tanang mga Tatay, Papa ug Daddy Happy Fathers Day kanatong tanan.Walay sama kanindot ang mahimong usa ka amahan. Sa maka usa pa, Happy Fathers Day!!!