Legal na gyud ang smuggling?

Alang ning tuiga moangkat ang nasud sa Pilipinas og balor sa 6.6 bilyones ka pesos nga bugas. Subay niini ang Fiscal Incentive and Review Board pinaagi sa ilang Resolution No. 4-11 mihatag og pagtugot sa National Food Authority og Tax subsidy o Tax Expenditure Subsidy alang sa ilang pagpamalit og bugas sa gawas sa nasud nga mobalor og six billion six hundred ninety-seven million five hundred sixty-seven thousand eight hundred pesos.

Tungod niini, ang National Food Authority mipahigayon og bidding alang sa pagpalit og 660,000 ka metric tonelada nga bugas ubos sa Private Sector Financed Importation gamit ang Tax Expenditure Subsidy. Sa bidding nga gipahigayon, tulo ka mga Sugboanon ang nakadaug ug kini mao ang Visayan Agri Trading sa San Antonio Jubay, Liloan, Edisa Cabuenas Store sa Ilang-ilang, Lagtang Talisay ug Nilo Alegado Rice and Corn Dealer nga nahimutang sa Consolacion Public Market, Poblacion Oriental, Consolacion, Cebu nga gitugotan nga makaangkat og tag 20 mil ka metric tonelada nga bugas. 

Ubos niining maong arrangement puwedeng makaangkat og bugas didto sa gawas sa nasud ang mga pribadong indibiduwal og gani i-subsidized pa sa National Food Authority ang ilang bayronon nga buhis sa gobyerno. Sa laktod nga pagkasulti, gihatagan og pabor sa NFA ang mga importer og bugas.

Ang nakaparat lang ning maong arrangement kay way klaro ang monitoring sa NFA ngadto sa mga bugas nga giangkat gikan sa gawas maong sayon kaayong sakyan sa mga smuggler og bugas. Kun sa panahon ni Pangulong Gloria Macapagal Arroyo gimando gayod nga sako nga may markang NFA ang sudlan sa mga bugas nga gipalit sa gawas sa nasud, karon wala na, maong di ka na makaila kun ang mga bugas nga nangabot NFA ba o pinalusot. Ning maong patakaran gitugotan sa NFA nga makalusot ang mga smuggler og bugas. Mao kini ang hinungdan nga dinhi sa Sugbo nagsagol na ang legal ug mga illegal o pinalusot nga bugas.

Si National Food Authority Administrator Angelito Banayo nakadawat ba og suburno sa mga smuggler? Wa ko mamasangil, nagpakisayod lang.