EDITORYAL - Ang kapikal ni Kong. Tommy

Sa tuno ni Kongresista Tomas Osmeña nga nagkanayon di na panahon karong diktahan sa relihiyusong pundok ang gobyerno, masabtan nato nga gibati og kapikal ug kapuol ang kongresista sa habagatang distrito sa dakbayan sa Sugbo bahin sa mga lider relihiyuso nga manghilabot sa kalihokan sa gobyerno.

Sa pagka tinuod kung lider ka sa relihiyon atimana ang imong katungdanan sa pagtudlo og matarong sa imong mga sakop ug pasagdi usab ang mga lider sa gobyerno nga motuman sa ilang katungdanan sa pag-atiman sa ekonomiya sa nasud.

Tinuod ang pagpanghilabot sa mga lider relihiyuso sa mga gimbuhaton sa gobyerno “noong alaw lang yon” sama kang bayaning Jose Rizal nga mipakita na og pagsupak sa mga mandar sa mga Katsilang lider sa relihiyon gipapatay siya, tungod kay sa maong panahon mga lider sa relihiyon maoy naggawong sa mga lider sa gobyerno.

Apan di baya sayop si Kongresista Osmeña tungod kay may scientific o Biblical bases   nga gipasikaran sa iyang pamahayag.

Kay base sa Biblia, ang tinuod nga relihiyon gimandaran sa Dios nga angay magpasakop sa kagamhanan ug di kay maoy modiktar sa kagamhanan.

Busa sayon ra kaayo nimong hubaron kining maong lohika, nga sa higayong ang mga lider sa relihiyon buot nang mogawong ug mokabayo sa mga namunoan sa gobyerno, aw wa diay sila mandari sa Dios bahin sa hustong pagtahod ug pagrespito sa gobyerno.

Apan dinhi sa atong nasud murag wa may mga lider sa relihiyon tingale nga nag-apil-apil sa kalihokan sa gobyerno sa pagpadagan sa nasud.

Kay kasagaran sa mga lider sa relihiyon dinhi dako man kaayo og pagtahod sa mga balaod sa gobyerno tungod kay ang atong kagamhanan maoy may gahum ug katungod sa pagmontar og mga balaod nga ikaayo sa mga Pilipino. Di   ba?