Makasulbad ba sa kawad-on ang RH Bill?

Ang mga nagpaluyo sa RH Bill (bag-ong ngalan: Responsible Parenthood , apan mao lang gihapon ang content sa ato pa, same dog, different collars), moinsistir nga pobre ang atong nasud, kuwang ang pagkaon, tungod kay daghan kita’g anak.

Aron pagsulbad sa kawad-on ug kagutom, gikinahanglan ang mga condom ug contraceptives, meaning kinahanglan mahimong balaud ang RH Bill. Ang gitawag nga Urban Poor Women’s League (Tawon sad uy. Kaluoy!), namahayag nga sa miaging Mother’s Day, ang RH Bill kono maoy labing maayo nga regalo nga atong ikahatag ngadto sa mga inahan. RH Bill: Best gift for moms, nila pa.

Samtang sa laing bahin, ang Sentro para sa Repormang Agraryo mihan-ay sa pipila ka hinungdan pagnihit sa bugas. Matud nila, “Land use conversion has seriously affected rice production in the Philippines. The conversion of thousands of hectares of rice fields into eco-tourism hubs, residential areas and industrial zones continues without letup.”

Dugang niini, sumaa sa inyong nasayran, gumikan sa atong pagkausikan, tons upon tons of rice ang mausik gikan sa atong mga talad-kan-anan, hinungdan nga daku ang usik sa daan nang nagnihit nga bugas.

Sa ato pa, kun magpadayon ang land use conversion sa mga uma ug sa atong pagkausikan, magpabilin kitang kabus ug gutom, bisan kun mapasar ang RH Bill. Daghan ang nakaingon sa atong kawad-on. Ato kining atubangon pag-una, inay nga atong tudloan ang atong mga anak unsaon nga dili mamabdos ang kababayen-an.

Si House Speaker Feliciano Belmonte, mipasalig nga ilang ipalusot ang House Bill 4374 kon ang Filipino Volunteerism in Nation Building Bill nga maghimong Poverty-free ang atong nasud, uban sa panagtambayayong sa mga non-government organizations, private sector, civil societies, ug sa general public.

Sa ato pa, sama sa Gawad Kalinga … Bayanihan spirit. Nga kun maghugpong kitang tanan, magtinabangay, ato dang mabuntog ang kawad-on. Mao unta kini ang hatagan sa unang priority sa atong mga magbabalaud, inay magpunay’g debate kun ang RH Bill maoy bugtong makasulbad sa atong kawad-on.

Alang ra ba ni Palasyo, morag RH Bill maoy bugtong solusyon. Alang kanila,mas sayon ang pagpugong sa pagpanganak kay sa pag-produce og daghang bugas. Alang kanila, lisud ang pagpausbaw sa rice production kay sa pagpagamit sa condom ug mga contraceptives.

Di kinahanglan mo-produce kita’g daghang bugas. Total makapamalit man tag bugas gikan sa mga nasud nga atong gitudloan unsaon pag-produce og daghang rice. 

Sa iyang novela, giulohan “Prolifers,” si Michael William O’Malley ,usa ka Canadian pro-life activist ug novelist, misaway sa RH Bill.Giingon dinhi : “The novel tells a story of a country where contraception and abortion have been legalized and enforced by the State penalizing pro-life people who oppose artificial family planning methods. The same problems will happen in the Philippines if the RH Bill is passed and becomes law.”

Unswa na ni,Dro?