Kinsay sayop?

Gitataw ni Cebu City South district Congressman Tomas Osmeña nga dili siya supak nga mugnaon na ang mga infrastructure project diha sa Banilad ug Talamban kun wala na ang problema sa trapiko sa maong dapit. Apan ang pangutana kun kanus-a nga masulbad ang problema sa trapiko diha sa Banilad-Talamban Highway. Tan-aw nako lisud nga masulbad ang problema sa trapiko diha sa Banilad ngadto na sa Talamban kun dili palapdan ang karsada.

Kun palapdan man usab ang karsada, magkinahanglan kini og binilyon ka pesos nga salapi. Ang laing paagi pagpaminus sa problema sa trapiko diha sa Banilad-Talamban Highway nga dili palapdan ang karsada mao ang paghimo og laing karsada lumbay sa Gov. Mariano Cuenco Avenue.

Dunay ubang nangutana kun si Tommy, nga dili na mayor, makapugong pa ba sa pagdili nga matukod ang mga infrastructure project diha sa Banilad-Talamban area nga dili na man siya mayor.

Ang tinuod dili na makapugong si Tommy kay dili na man siya maoy mayor, apan gamhanan gihapon siya kay daghan pa man sa mga konsehal diha sa konseho nga hugot nga mitahud kaniya.

Sa among panaghinabi ni Tommy didto sa iyang balay sa Guadalupe, gibutyag sa kanhi mayor nga dili siya uyon nga ipadayon ang pagtukod sa mga proyekto sama sa Ciudad Project sa probinsya diha sa Banilad.

Ang bugtong niyang rason mao nga ang pagmugna og bag-ong mga infrastructure project diha makatampo sa dugang kahuot sa mga sakyanan kay daghan na man unya nga mga tawo nga moanha diha.

Apan daw mibugal-bugal si Tommy. Matud niya nga kun ang Kapitolyo motukod og menteryo diha sa yuta sa probinsya diha sa Banilad, dili siya mosupak.

Dihang nangatawa mi nga mga reporters, gitataw ni Tommy nga wala siya magkomedya. Kun si Rama moinsister nga itugot na ang pagtukod og mga infrastructure project sa Banilad-Talamban area, sigurado ko nga ang mga konsehal nga alalay ni Tommy mobabag sa maong lakang.

Gisukna si Tommy ni higalang Leo Lastimosa kun may kahigayonan pa ba nga magkauli ang maayo nila nga kabubut-on ni Rama. Wala motubag si Tommy direkta sa pangutana. Igo ra niyang giingon nga dili na siya mosuporta ni Rama sa eleksyon karong 2013.

* * *

Uy, gipasakaan g’yud og kaso si Mayor Rama sa mga kabus nga pamilya nga taga Mahiga Creek, Mabolo. Kini tungod sa pag-insister ni Rama nga sila dili hatagan og relocation site o kaha financial assistance human gub-on ang ilang balay.

Maayo usab kay aron mahibaw-an nato kun kinsa ang husto. Moingon man usab gud si Rama nga dili na kinahanglan nga hatagan sila’g relocation site kay anaa man sila magpuyo sa sapa nga maisip nga nuisance per se.

Lahi man kuno, ingon si Rama, ang nuisance per accident kun ang usa ka balay nahimong gub-onon kay anaa kini sa karsada human nga kini naigo sa proyekto sa kagamhanan.

Apan matud ni Urban Poor leader Bimbo Fernandez nga anaa gayud kini sa balaud.

Belated birthday greetings diay ni Wenily Belle Miñoza, anak sa akong higala nga si Wendel Miñoza sa Good Shepherd Banawa. Nagsaulog siya sa iyang adlaw’ng natawhan kagahapon.