Pabadlong sa polis
Sa miaging semana sunod-sunod ang pasangil batok sa mga sakop sa atong kapolisan. Dihay gipasanginlang nanghinol og 18 anyos nga dalaga didto sa Argao, diha nalambigit og karambola ug pagpamusil didto sa Sibonga ug ang labing grabe ug makauuwaw sa tanan mao ang pasangil sa pagpanulis sa usa ka pulis og hapon didto sa Lapu-Lapu.
Usa ka PO2 Bruce Taneo sakop sa station 3 sa Mandaue City Police Office ang gidakop didto sa dakbayan sa Lapu-Lapu niadtong miaging Sabado sa kadlawon tungod sa giingong pagpanulis niini sa hapon nga si Masami Kon.
Ang hapon giingong dunay nadumbolan hinungdan nga kini migawas sa iyang gimaneho nga sakyanan. Apan usa ka lalaki nga nagsul-ob of camouflage ang miduol niya ug giingong mikuha sa iyang pitaka. Nasuta nga ang maong lalaki mao si PO2 Taneo.
Sa interview sa dyLA, ang hepe sa Mandaue City Police nga si Col. Noel Gillamac miingon nga dugay na siyang nakadawat og report sa illegal nga mga binuhatan ni Taneo.
Gani matud niya nga sa wala pa kini madakpi didto sa Lapu-Lapu daan na siyang gipanid-an tungod sa report nga nalambigit kini sa negosyo sa drugas. Matud ni Gillamac nga ang hepe sa Lapu-Lapu nga si Col. Anthony Obenza maoy personal nga nitawag niya ug nipahibawo sa kalihukan ni Taneo.
Busa kun wa siya madakpi sa pagpanulis, dili sab tingali magdugay madakpan ra gihapon siya tungod sa drugas. Unsa bay nahitabo sa mga sakop sa kapolisan?
Dili kaha kini resulta sa palusot sa recruitment sa kapolisan nga bisan kadtong dili gyud haum nga mamahimong polis madawat basta dunay kwarta? Tungod sa daghang badlongon nga mga sakop sa kapolisan, bisan bag-o pa gani sa serbisyo malambigit na sa pagpangabuso ug tinunto, maayo tingali nga i-review sa PNP ang ilang recruitment process.
Maayong sigurohon sa PNP nga way palusot sa mga mo-apply pagkapolis. Maayong siguradohon nga mopasar gyud sa tanang exam, labi pa sa neuro ug psychiatric exams ang mga aplikante.
Tingali malikayan ang ingon niini nga mga makauuwaw nga kaso kun haum ang tanang makasulod pagkapolis.
* * *
- Latest
- Trending
