Daghang nagkatawa sa pamahayag ni Vice Mayor Augustos Young dihang miingon siya nga di prayoridad sa iyang administrasyon karon ang pagbutang og mga kahimanan alang sa linog sa mga edipisyo sa eskuylahan dinhi sa dakbayan sa Sugbo tungod kay di man linogonon kining dapita.
Buot niyang ipasabot nga kun ugaling may linog nga mahitabo unya may makalas nga kinabuhi sa mga kabataang nagtungha, aw way kaso total kun di lang niya mga kadugo ang makabsan sa kinabuhi ok ra, kay nakapamulong naman siya niini.
Ang pagpangandam batok sa linog, di baya buot ipasabot nga nangandoy tang linogon ta, kay usa lamang kini ka paagi aron nga kun ugaling mahitabo ang panghitabo nga wa dahoma sa mga Sugboanon, aw di makaingon ang mga magbubuhis nga tanga ang mga opisyal sa gobyerno ning dakbayan.
Maayo man gani kay gisalbar dayon ni Mayor Michael Rama ang di maayong gipahayag ni VM Young, nasud-ong tingale ni Mayor Rama nga si Young wa pa gyud mahamtong sa pagkahimong lider, kay nagpabilin siyang sama sa iyang apilyido.
Korek kaayo si Mayor Rama dihang miingon kini nga dili igsapayn kun mogasto ang gobyerno og dakong salapi alang-alang sa kinabuhi sa kabataan, ug kini giabibahan sa mga ginikanan tungod sa pagkahamtong na sa iyang pagka-lider.
Kay ang emergency exit sa mga edipisyo nga pundokanan og tawo usa ka standard operating procedure nga mahimo rang planohon sa mga tawong yano ug labaw sa tanan kun usa ikaw ka opisyal sa gobyerno. Di ba?