Osama patay, Obama lipay

Napatay sa mga sakop sa US Navy SEAL ang numero uno’ng terorista nga si Osama bin Laden didto sa Pakistan niadtong Mayo 1. Nasayran nga niadtong Abril 29, 2011, si US President Barack Obama nitugot sa usa ka raid nga gitawag og “Operation Neptune Spear” diin “Geronimo” ang code name nga gigamit alang kang bin Laden nga didto nagpuyo sa usa ka $250,000 mansion sa usa ka compound sa Abbottabad, Pakistan, nga may gilay-on nga tunga ka kilometro gikan sa Pakistan Military Academy.

Sukwahi kini sa pagtoo nga si bin Laden didto nagtago sa usa ka langub sa utlanan sa Afghanistan ug Pakistan.

Gibanabana nga ni-kostar sa US og $3 trillion ang terorismo nga nahimo ni bin Ladin sulod sa 15 ka tuig, apil na ang kadaut nga nahimo niya sa ekonomiya ug ang pagpangita kaniya human sa pag-atake sa Twin Towers sa New York, hapit 10 ka tuig na ang nakalabay.

Niadtong Mayo 1, sa Washington, D,C, (Mayo 2, sa Pilipinas ug Pakistan) malipayon nga gipahibawo ni Pres. Obama nga si Osama napatay sa usa ka team nga gisakpan sa 24 ka mga U.S. Navy SEALs gikan sa Naval Special Warfare Development Group (SEAL Team Six), ubos sa Joint Special Operations Command uban sa pagtambayayong sa CIA.

Duha ka bala ang nakapatay kang bin Laden. Ang usa maoy nakaigo sa iyang ulo samtang ang usa sa iyang dughan. Ang raid natapos human sa 40 minutos.

Ang iyang kamatayon gipahibawo pinaagi sa paggamit sa code phrase “Geronimo E-KIA” (enemy - killed in action).

* * *

Gipasakaan sa pipila ka mga empliyado sa Bureau of Customs og sumbong graft sila si Finance Secretary Cesar Purisima. Finance Undersecretary Guillermo Parayno, Jr. ug Customs commissioner Angelito Alvarez sa Office of the Ombudsman tungod sa padayong smuggling sa mga ukay-ukay.

Kining maong palusot wala gayud mahunong bisan pa sa saad ni President Noynoy Aquino nga iyang hunongon ang kurapsiyon.

Sumala pa sa sumbong, gitugutan usab nila ang paggamit sa mga hao siao (dili mga empliyado sa customs), sama kanila ni Cesar Manuel ug Andy Ong, nga maoy gigamit niining mga opisyal sa customs aron mangilkil sa mga importers. Gibayran sila ug ang kapin sa 2,500 ka mga hao siao gikan sa salapi nga ilang makilkil.

Dili ko motoo nga wala masayud si Pres. Aquino niining grabeng kawat diha sa customs.

* * *

Dili igo kining saad ni P.Noy nga iyang sumpoon ang kurapsiyon sa gobiyerno. Grabe man gihapon ang pangilkil sa customs ug sa ubang mga buhatan.

Mao usab kini ang gipatoo ni Cebu city Mayor Mike Rama. Nagpadayon man gihapon ang kurapsiyon diha sa city hall. Sumala pa ni Gov. Gwen Garcia “ang buhat maoy pasultihon dili ang sulti maoy pabuhaton.”

* * *

Wala ko kasabut niining katarungan ni Cebu city Vice Mayor Joy Augustos Young kalabut niining nakita sa DepEd nga adunay mga tunghaan nga walay mga emergency exit ug kulang sa hagdanan.

Sumala ni Young nga walay angay kabalak-an kining maong mga eskwelahan tungod kay dili man kuno kini tandugonon og linog ug dili usab kuno kini kuyaw sa sunog kay ginama man kini sa semento ug layo usab kuno sa mga squatter.

Dili kuno praktikal ug momahal ang pagtukod sa mga school buildings kun tumanon gayud kuno ang gimbut-an sa national building code ug fire code. Dili kuno priority sa siyudad ang pagtuman niini.

Buot bang ipasabut ni Vice Mayor Young nga unya na kita molihok kun madisgrasya na ang mga tinun-an ug mga magtutudlo? Kun mao kini nganong ato man nga gi-estrikto ang pagpatuman niining national building code ug fire code dinhi sa Cebu city? Sumala sa sinultihan “the sauce for the goose is the sauce of the gander.”

Ako nagtoo nga katarungan na lang kini sa bise mayor aron makapanghunaw siya sa maong kalapasan tungod kay may kalabutan man siya sa katukuran niining maong mga school buildings isip chairman sa committee on education sa konseho.

* * *

Akong pahimatngon ngadto sa mga buot mopalit og mga electronic products labi na sa mga cellular phones. Pili-a gayud ninyo kining tindahan nga inyong palitan labi na sa mga China cellphones.

Anaay tindahan diha sa APM mall nga ang supervisor usa ka Insik (ambut ug naa ba siyay husto nga mga dokumento aron makatrabaho dinhi sa nasud) nga namaligya og mga depektoso’ng mga produkto. Lisud usab ikaw pagpa-ilis og lain nga brand bisan kun mga gubaon gayud ang sama sa brand nga imong gipalit.

Maayo unta nga i-check sa customs kun dili ba smuggled kining mga China products nga gibaligya niining maong tindahan.

Dili lang usa nako ipahibawo ang ngan niining maong tindahan apan ako kining ilhon sa umaabut nga adlaw o kun motawag kamo kanako pinaagi sa cell # 0915-7808688.

* * *

Email:[email protected]