Instigation ug entrapment

Una gireklamo ni Lyzanne Labiste si PO3 Richard Cyrus Valencia sakop sa kapolisan sa dakbayan sa Sugbo tungod sa pagsulod niini sa ilang panimalay sa Barangay Guadalupe kay nangita og kriminal. Gipasanginlan usab niini ang polis nga mitutok kaniya og pistola samtang hubo ang ibabaw nga bahin sa iyang lawas niadtong tungora tungod kay paingon pa siya nga mag-ilis. Ang dalagang reklamante pursigido gayod sa pagpasaka og kaso batok kang PO3 Valencia.

Apan pipila ka adlaw human ireklamo ni Labiste sa Super Radyo ang gihimo sa polis ngadto kaniya, gidakop siya sa polis atol sa gipahigayon nga entrapment operation human siya pasanginli ni PO3 Valencia nga nanapi kaniya og 80 mil ka pesos apan atol sa negosasyon misugot kini sa kantidad nga 20 mil ka pesos. Kaniadtong miaging adlaw gipasaka na ang kaso batok kaniya.

Atol sa interview ni Super Bobby Nalzaro sa iyang programa sa DySS gitug-an ni Miss Labiste nga wa siya mangayo og kwarta ngadto sa polis hinoon ang polis maoy miduol kaniya ug mitanyag og salapi aron dili na kini niya pasakaan og kaso. Apan ang polis nga si Valencia miinsister nga si Labiste ang nangayo og salapi bugti sa dili pagpasaka niini og kaso.     

Kining maong kaso maingon natong instigation o ba kaha entrapment. Sa instigation ang usa ka police officer o ba kaha usa ka private detective motukmod ngadto sa usa ka inosenting tawo sa paghimo og krimin ug sa dihang nahimo na ang krimin iya ra kining unayon sa pagdakop. Sa atong balaud wa kini itugot.

Samtang sa entrapment ang usa ka tawo adunay plano o laraw sa paghimo og krimin o paingon na gayod sa paghimo og krimin ug ang usa ka police officer mihimo og mga lakang ug pamaagi sa pagbaling ug pagdakop kaniya. Sa atong balaud gitugot kini.

Sa inyong basa biktima ba si Miss Labiste sa instigation o balido ang pag-entrap kaniya. Kun unsa may naa sa inyong huna-huna, pariha ta.