Customs gipalayas na sa CPA

Gihinginlan na sa Cebu Ports Authority ang Bureau of Customs sa giukupahan niini nga luna diha sa Cebu International Port tungod sa giingong kapakyas sa aduana pagbayad sa binuwan niini nga abangan sulod na sa milabay’ng unom ka tuig.

Si CPA general manager Dennis Villamor mipadala og suwat ngadto ni collector Ronnie Silvestre nagpahibawo niini nga kinahanglan na silang mobalhin og buhatan. Matud ni Villamor nga ila nang gamiton ang luna aron magsilbi nga storage area tungod kay matud naghuot na kuno ang CIP sa mga kargamento.

Gawas niini gitug-an ni Villamor nga wala diay makabayad sa abang ang BOC sukad pa niadtong 2005. Ang Customs ug ang CPA misulod og usa ka memorandum of agreement niadtong Septiyembre 2005 alang sa paggamit sa building nga kasamtangan karong gihimo nga opisina sa customs.

Ubos sa MOA moabang ang customs og 50 mil pesos matag buwan ngadto sa CPA. Apan napupos nalang ang termino sa MOA niadtong miaging tuig giingong wala gyud makabayad sa abang ang customs.

Mao nga giawhag ni Villamor ang customs nga mopahawa na sa ilang building. Gisugyot sa CPA nga bawi-on sa customs ang ilang kaugalingon nga building, ang Malakanyang sa Sugbo, nga wala nay gamit sa pagkakaron.

Dunay punto ang sugyot sa CPA, nganong dili man tinuod i-uli ang Malakanyang sa Sugbo ngadto sa Customs nga maoy nanag-iya niini? Inay nga pasagdan nga magbarog nga way probitso ang maong karaang building mas maayo nga ihatag ni ngadto sa usa sa labing importante nga ahensiya sa gobyerno.

Nasayod ta unsa kamahinungdanon ang customs sa gobyerno tungod kay usa ni sa responsabli pagkolekta og buhis aron dunay magamit nga budget ang atong gobyerno matag tuig.

Sa kadako sa pwerto sa Sugbo sigurado ko nga dakong kantidad sab ang gitampo niini sa panudlanan sa atong gobyerno. Busa makiangayon lang tingali nga ipahiluna ni og maayo sa Malakanyang, inay nga mahulog nga squatter.

Kung buot huna-hunaon sayop baya sa nasudnong pangagamhanan, hinuon atol pa sa pamunoan ni kanhi presidente Gloria Macapagal Arroyo, nga ilang gipapahawa ang customs sa building niini nga wala lang gani hatagi og relocation.

Gikuha ni Arroyo kaniadto ang opisina sa customs ug gipasagdan nga mangita og asa sila mobalhin. Maayo pay squatters nga nabiktima og demolition kay duna pay relocation site.

Apan ang customs atol sa pamunoan ni Arroyo gipapahawa sa ilang pinuy-anan nga way relocation unya gipaabang pa sa CPA. Dili husto nga ingon niini ang tratamento sa nasudnong pangagamhanan sa ahensiya nga maoy tinubdan sa kwarta nga gigasto ug gikurakot sa atong gobyerno.

* * *

[email protected].