Sinugdanan sa hustisya

Human sa taud-taud nga pagpaabot nga masugdan ang proseso sa ilang gipangandoy nga hustisya, ang pamilya ni Ellah Joy Pique makaginhawa na og lu-ag human ipasaka sa kapolisan kagahapon ang kaso batok sa gitumbok nga mao na gyuy tinuod nga mamumuno sa bata.

Ang task force nga giumol sa kapolisan human mapalpak ang Cebu Provincial Police Office sa unang imbistigasyon sa hitabo, mipasaka sa kasong kidnapping with homicide batok ni Ruby Bella Santos ug sa hinigugma niining Briton nga si Ian Charles Griffith.

Labing minus 12 ka mga tistigo ang gibasihan sa kapolisan sa ilang pagkiha ni Santos ug Griffith. Bisan wala pa ang resulta sa mga laboratory examinations sa mga ebidensiya nga ilang nasakmit didto sa panimalay ni Santos sa Barangay Inayagan sa Naga apan kumbinsido na gyud ang kapolisan nga ang manag-uyab maoy naghimo sa krimin.

Sama sa gisaligan ni Sr. Supt. Erson Digal dihang iyang gikiha sila si Karen Esdrelon ug Erik Berger, ang task force nagsalig sab sa positive identification sa mga saksi ngadto sa mga sinumbong.

Sukwahi hinuon sa gihimo ni Digal nga pulos testimoniya ug wa gyuy bisan gamay nga circumstantial evidence, ang task force nangangkon nga dunay daghang circumstantial evidence nga ilang nahuptan.

Pananglitan ang Pajero nga giingong maoy gigamit sa pagdagit sa bata niadtong Pebrero 8 didto sa Calajoan, Minglanilla. Dili sab maisplikar ni Santos ug Griffith kun diin sila niadtong adlaw nga gidagit ang bata.

Ang ilang depensa mao nga diha ra sila sa Inayagan niadtong Pebrero 8 ug wala gyud sila molakaw. Apan ang Inayagan duol ra kaayo sa Calajoan, Minglanilla sanglit silingan ra man sa dakbayan sa Naga ang maong dapit.

Nasakmit sab sa kapolisan ang daghang mga pornographic materials sulod sa pinuy-anan ni Santos ingon man ang mga hapin sa katre nga dunay gidudahang lama sa dugo. Tataw nga ang gisunod sa kapolisan nga motibo sa krimin mao ang “cyber pornography.”

Laing kadudahan nga pamahayag ni Santos mao ang ilang pangangkon nga human sila mabiya-i sa ayroplano nga ila untang sakyan paingon sa Singapore niadtong Pebrero 7 ilang gipa-rebook ang ilang ticket alang sa petsa 9 nga biyahe.

Apan sigun sa certification nga nakuha sa kapolisan gikan sa Singapore Airlines walay rebooking nga nahitabo. Matud pa nga nakabiyahe man tinuod sila si Griffith ug Santos niadtong petsa 9 apan dili isip regular passenger kun dili chance passenger.

Human mapasaka ang kaso batok nila, si Santos miatubang sa mga sakop sa media nga nagbakho. Iyang giakusahan ang kapolisan nga mga ignorante ug nipahimulos sa iya usab nga pagkaignorante sanglit matud niya wala man siyay grado.

Dili isyu dinhi kun may grado ug wala si Santos, ang angayan niyang pamatud-an mao nga inosente siya sa kremin taliwala sa giingong lig-on nga mga ebidensiya nga gihuptan karon sa kapolisan batok niya ug sa iyang hinigugma.

* * *

[email protected]