Sagutin ng gobyerno pamasahe ng OFWs

BILYONG dollar ang ipinapasok ng OFWs sa Pilipinas. Kaya nga sila tinawag na mga “bagong bayani”. Pero sapat na ba ang magandang taguri para sa kanila? Sapat ba ang ginagawa ng gobyerno sa mga pagsasakripisyo ng OFWs.

Kaawa-awa ang kalagayan ng OFWs partikular ang mga nasa Japan at ibang lugar. Maraming Pinoy na gustong umuwi sa Pilipinas dahil sa kaguluhang nagaganap sa kanilang kinalalagyan. Katulad ng mga Pinoy sa Japan na delikado dahil sa radioactive leak.

Ang problema ay hindi sila makauwi dahil sa wala silang perang pamasahe sa eroplano at kung mayroon man ay hindi sapat sa dapat nilang ibayad sa eroplano. Marami ang humihingi ng tulong lalo ang pampinansiyal. Ang hindi ko maintindihan ay kung bakit hindi masagot ng ating gobyerno ang pamasahe. Hindi ba puwedeng ang gobyerno ang makipag-arrange sa PAL para makauwi na ang mga OFW?

Maraming paraan ang magagawa ng gobyerno upang tulungan ang mga OFW. Hindi dapat pabayaan ng gobyerno ang mga OFW na nakakatulong nang malaki sa bansa. Obligasyon naman ngayon ng gobyerno na kalingain ang mga “bagong bayani”.